Ioh shuti ki nonghikai, ba dap 35 snem KJDSTA

Shillong, 27 Risaw:
Ka sorkar jylla lyngba u Joint Director ka School Education and Literacy, ka la pynmih ia ka jingbna ba ka ai shuti ia kito ki nonghikai skul Khasi Jaintia Deficit School Teachers Association (KJDSTA) kiba kwah ban leit sha ka jingrakhe pynkut dap 35 snem ka seng ha ka 30 tarik Risaw, 2015 ha Shillong.
Ha ka jingpynbna, ka la ong ba la ai shuti kyrpang ia kito ki nonghikai ban leit iashim bynta ha katei ka jingrakhe pynkut dap 35 snem ka KJDSTA ha ka 30 tarik Risaw tangba, kiba kwah ban shimti shuti ki dei ban ioh ia ka jingmynjur na ki bor pyniaid skul ne managing committee. Ki skul kim dei ban khang ha katei ka sngi, la ong u Joint Director.Ha kawei ka liang, ka KJDSTA ka la kyrpad ia ki bor pyniaid skul ba kin ai ia ka jingiatreilang bad ki nonghikai ban ai shuti ia kito kiba kwah ban wan iashim bynta ha katei ka sngi.Ha kane ka jingrakhe pynkut, u Lat ka jylla u V Shanmuganathan un long kum u kongsan, la ong ka kyrwoh na ka KJDSTA.