Shillong, 20 Jylliew:
U khynnah uba pheil ha ka eksamin Matrik mynta u snem u la ioh ia ka sertiphiket pass na ka MBOSE, utei u khynnah uba la tip kyrteng kum u Tilberth G Marak u don ia ka sertiphiket kaba la don ia ka muhor ka MBOSE kaba la pyni ruh ba la soi da u Controller Examination, MBOSE -Tura.
Haba peit ia katei ka sertiphiket ka long thik kum ka sertiphiket ba ka MBOSE ka ju ai sha ki samla kiba pass Matrik, hynrei, namar ba ka jingtih bniah ia katei ka kam – ka dang iaid ym pat lah ban ong la katei ka kam ka dei ka kam jyrsieh jong ka MBOSE ne ka dei ka jingleh thaw nang bad ka jingleh thok jong utei u khynnah pule.
Katkum ki kot ki sla ba utei u khynnah skul u la ioh ka pyni ba ka skul jong u ka dei na Tikrikilla Higher Secondary School (Science),Tikrikilla bad u Principal katei ka skul u la ai ia u ka Testimonial Certificate kaba pyni ba u u Tiberth G Marak u dei u khynnah skul katei ka skul uba la pass ia ka matrik bad la pyni ha katei ka jingthoh ba u Roll No jong u ha ka eksamin matrik u dei 53851 bad na ka sertiphiket ba u la ioh na ka MBOSE ruh ka la pyni ba u don ia utei u juh u Roll No bad ha ki kot ki sla kiba don ha kti utei u khynnah mynta ruh ki pyni hi ba u bat ia utei u juh u Roll no 53851.
Hynrei haba wad pat na ka website jong ka MBOSE kaba pynmih ia ka resol Matrik mynta u snem la lap ba utei u Roll No um dei ha ka kyrteng jong u Tilberth G Marak hynrei u dei ha ka kyrteng jong uwei u khynnah uba la tip kyrteng kum u Sengrikchi B Sangma na ka Centre Siloam Public School, Raksamgre kaba pyni ba utei u khynnah u pass lut baroh ki sobjek. La lap ruh katkum katei ka website ba ka kyrteng jong u Tilberth G Marak ka don ia u Roll No.61517 bad u la pheil lut baroh ki sobjek lait noh ka sobjek Garo ba u la ioh 45 mark.
La bat ia utei u khynnah da ki nongialam ka Garo Student Union ba la ialam da u Walseng Akai Nengminja uba dei u President ka GSU- Tikrikilla ha ka por ba u dang leit wad Kolej ha Tikrikilla College na bynta ban ioh rung klas ha ka klas XI. U President ka GSU u la ong ba utei u khynnah skul u la ia leh ia ka eksamin na kawei ka jaka thoh eksamin ne ka Centre kaba don ha ka skul Indira Gandhi Memorial Girls Secondary School, Bajengdoba bad u la ong ruh ba utei u khynnah u pass tang shi sobjek, hynrei kaba pynlyngngoh ia katei ka seng ka long ba u ioh pat ia ka sertiphiket pass na ka MBOSE. U Walseng u la ong ba ka GSU ka la phah ia utei u khynnah kumjuh ia ki kmie ki kpa jong ki ba u dei ban aiti lut ia baroh ki kot ki sla ba u la ioh sha ka GSU bad ba kin ia treilang ryngkat bad katei ka seng haduh ban da ioh ban kem ia ki briew kiba donkti ha katei ka kam lehtuh bad u Walseng u la ong ba hadien ba la ioh ia ki jingshisha baroh katei ka seng kan sa leit ban ujor FIR.
Phi don ban ong eiei?