Shillong:Ki shnong ha ki thaiñ nongkyndong jong ka Ri India ki la sdang kiew sted bha ha kaba ïadei bad ki kam jngoh kai pyrthei, kawei na kitei kadei kawei ka shnong hapoh jylla Meghalaya kaba la paw ha ka map jngoh kai jong ka pyrthei bad katei kadei ka shnong Kongthong kaba la shah jied ban ïoh rung hapoh ka UNWTO (The World Tourism Organization) kum ka Shnong kaba lah duh ne ‘Best Tourism Village’ ha ryngkat bad kiwei pat ki artylli ki shnong ha India.
Ka Kongthong ka long ka shnong kaba paw khmat bha halor ki riti dustur ha kaba ka kmie ka ju khot kyrteng ïa ki khun da kaba shu pah ne siaw kum ka Sur jingrwai ha ka jaka jong ka kyrteng.
“Ka shnong Kongthong kaba don ha Meghalaya ka shnong kaba shu kynud, shu pah ne siaw haba khot kyrteng ka la shah jied ban ïoh rung hapoh ka UNWTO World Tourism Organization ‘Best Tourism Village’ ha ryngkat lang bad artylli ki shnong ka India,” thoh u Myntri Rangbah ka jylla Meghalaya u Conrad K Sangma, haba pyn bynta ïa ka khubor hapoh Facebook.
Ka Kongthong, kaba dang don bun ki khlaw ki btap bad ka jingitynnad ka sawdong sawkun, la ju ïalap khana pateng halor ka jinglong kyrpang ka riti dustur kaba la ju khot ka ‘Jingrwai Iawbei’ ha kaba ka kmie ka ju ai ne thaw ka jingrwai Ïawbei ban ai kyrteng khun hapoh ka shi taïew ba la kha ïa I khun, kaba kylla long pat ka kyrteng jong u ne ka ha ka jaka jong ka jingbuh kyrteng. Ka kmie ka hap ban thaw ïa ka kyrteng ka ban long ïapher na kiwei kiba lah dep don lypa jong kiwei pat,khnang ban pynthikna ba ka jingithuh jong ki khun kan dei ban long pher ne kyrpang. La ju tip bad ïathuh ba ki briew jong katei ka shnong ki ki ïakren khana lyngba ki sur kynud jingrwai ne ba shu pah ne siaw.
Nalor ka Kongthong, kiwei pat ki Shnong hapoh ri India kiba la ïoh jingithuh kidei ka Pochampally jong ka Telangana bad Ladhpura Khas kaba ha Madhya Pradesh.
Lah ban ong ba ka Khat-ar-shnong, kaba ha East Khasi Hills distrik, Meghalaya ka don bun kiwei pat ki Shnong ha kaba ki nongshong shnong ki khun iwei ïa iwei pat da kaba kynud ne pah bad ïakren da kaba shu siaw, nalor jong ka Shnong Kongthong.
Ha Khat-ar-shnong la ïathuh ruh ba yn shem ïa ka jingkieng jri ne living root bridge kaba heh bha kaba la tip kyrteng da ka Jingkieng Myor bad hapoh ka Khat-ar-shnong kidon kiwei pat ki Shnong kum ka Mawrah viewpoint, ka Khrang, ka Dewlieh nalor kiwei pat, kumba la paw hapoh ka Meghalaya Tourism Site.
Phi don ban ong eiei?