Shillong:Ki rang ialehkai jong ka India ki la ioh ban pynieng bad pyni bor da kaba ioh ban pynliem ia ka Maldives da 3-0 ha ka FIFA International Friendly ba la lehkai ha JN Stadium mynhynnin ka janmiet.
Kane ka dei ka jingialehkai ba nyng kong jong ka Shillong ha kane ka madan ha ka jingialehkai phutbol bad ka ri ba shabar, ka ba la pyni ia ka jinglah ba la wanrah ha kaba iadei bad jingtei bad ruh ka jing kyrshan ba pynpaw jingieit da ki nongkyrshan.
U Sunil Chhetri ula ioh ban thep ia kawei ka kol ha ka jingwanphai biang jong u sha ka jingialehkai shabar ri katba u coach Manolo Marquez u la ioh ia ka jingjop ba nyngkong haba u coach jong ka kynhun ialehkai phutbol ka India lem bad ka kynhun kiba la ioh ban khung ia ka jingjop ba nyngkong hadien 489 sngi.
Ki ar tylli ki kol la ioh ban thep da u Rahul Bheke bad u Liston Colaco ban buh ia ka Blue Tigers ha ka jaka kaba shakhmat katba u Chhetri u la ioh ban thep ia ka kol kaba 95 jong u ha ka jing- wanphai sha ka kynhun ialehkai jong ka ri.
Ki kynrem ki lyndan kiba la don ryngkat ha katei ka sngi, ki kynthup ia u myntri ba don burom ba dei khmih ia ka Sport and Youth Affairs, u Bah Shakliar Warjri bad u President jong ka Meghalaya Football Association, u Bah Hamletson Dohling, kiba la ai khublei ia ki nongialehkai bad ki bor pyniaid jong ka ha shuwa ban sdang ka jingialehkai.
Kane ka jingia lehkai, ka pynshisha ba ka long ka jingpyn khreh ba janai jong ka India ban ialehkai ia ka AFC Asian Cup Qualifier 2027 pyrshah ia ka Bangladesh ha ka 25 tarik u Lber, ban ialehkai ha kane ka madan.
Ka Maldives, nalor kane, ka la pynkhreh ia kane ka jingialehkai na ka bynta ka jingiakhun pyrshah bad ka Philippines ban lehkai ruh ha ka 25 tariku Lber.
Kane ka long ka jingialehkai ba 19 jong kine ki arliang, ryngkat bad ka jingkhein baroh ka jingjop jong ka India kumba 13 tylli ki jingjop. Ka Maldives ha ka ioh ruh ban jop laisien, ryngkat bad lai tylli ki jingialehkai ba la pynkut da ka jingiakhaid.
Ka sien ba khatduh ba kine ki arliang ki ioh ban ialehkai lang ka long ha u snem 2021, haba ka India ka la jop 3-1 ha ka SAFF Championship.
Phi don ban ong eiei?