Ioh pyllait ka KSU Delhi, ia kawei ka samla na kti kiba pyniaid khaii met

Shillong: Ka Khasi Students’ Union lyngba ka kyrwoh ba la phah na u Rapborlang Nongrum Publicity Secretary ka pyntip sha baroh ki kmie ki kpa, ki hynmen ki para ka Bri U Hynniewtrep ba kin husiar ban phah lada ki khun ne para jong ki, ki leit ban pule ne trei shabar khamtam ha nongbah Delhi.

Kane ka jingkyntu ka wan hadien ba ka KSU Delhi Unit ka la ioh ban pylait ia kawei ka samla lud Khasi kaba na West Jaintia Hills kaba la shah thok ha ki agent kiba kular pynioh kam ia ka ha nongbah Delhi, hynrei phewse ki la pynngop pynban ia ka ha ka kam die met.

Ia kane ka khynnah ba ka seng kam kwah pynpaw kyrteng la leit shaw ia ka na Ghazipur ha Delhi hajan khappud Uttar Pradesh. Kane ka samla Khasi na West Jaintia ka la lait phet na kti kitei ki runar mynnin ka miet bad mar mar ki dkhot ka KSU Delhi Unit hapoh ka jingialam u samla Wallambok Nongsiej Vice President, ki la leit shaw noh ia ka na katei ka jaka. Katkum ka jingioh jingtip shuh shuh la la bna ba ki dang don sa katto katne ki samla Khasi Pnar kiba dang shah bat ha kitei ki runar khaiii met. Shuh shuh katei ka kynhun ka dei kaba iar bha bad don kti ruh ki briew na Assam bad Meghalaya. Ka KSU Delhi Unit halor kane ka kam ka la ujor da ka Complaint sha ka Delhi Police North East Cell. Shuh shuh ki la pynsah shwa shipor ia katei ka khynnah hapoh Meghalaya House.

U General Secretary ka KSU CEC mar ia ioh jingtip u la phone mar mar ia u Home Minister ka jylla u ma Lahkmen Rymbui ban shim khia halor kane ka jingjia khnang ban ioh pynwan phai noh sha iing ia katei ka khynnah, ban pynlait noh ia kiwei kiba dang shah set bad ban kem noh mardor ia ki runar kiba don kti ha katei ka kam pohjait. Na ka liang ka KSU Jaintia Hills District Unit ruh ka la shim khia ha kaba ka la pyntip bad ia syllok bad kiba ha iing katei ka khynnah.

Ka KSU ka ai khublei kyrpang ia baroh kiba la iarap ia katei ka khynnah ba shem lanot naduh u Home Minister, u ma Lahkmen Rymbui, u ophisar ka CID branch u Aditya Goel, ki pulit ka MLP 3rd Battalion bad ki nongtrei ka Meghalaya House.