Ioh nong T. 13.76 klur ka kompani khaïi bording na ka MeECL

Shillong, 18 Risaw:
Ka kaiphot jong u Comptroller and Auditor General (CAG) ka la sei madan ba ka MeECL ka la leh sbun palat ban ai jingiarap haduh T. 13.76 klur  sha kawei ka kompani ba khaïi bording kaba la die ia ka bording sha kane kajuh ka kompani ha ka dor kaba kham duna.
Ka kaiphod u CAG na ka bynta u snem kaba kut ha ka 31 tarik Lber, 2014, ka la dew ba ka MeECL ka la iasoi ia ki soskular ban die bording bad ar tylli ki kompani kaba kynthup ia ka M/S Global Energy Private Ltd. (GEPL) na ka bynta ban die kumba 12 MW ka bording ha u bnai Naitung bad u bnai Nailar jong u snem 2013 ha ka dor T. 1.95 pisa na ka bynta shi unit ka bording.
La pyni ba ka MeECL ka la die ruh kumba 49.13 million unit ka bording sha ka GEPL kaba shongdor kumba T.9.58 klur naduh ka 21 tarik u bnai Jylliew haduh ka 15 tarik Risaw, 2013 ha ka dor kaba shong T.1.95 paisa shi unit bad kaba kham sngewphylla ba ka la die bording kylla sha kane kajuh ka kompani ha ka dor kaba T. 4.75 pisa shi unit bad kane ka jingleh jong ka MeECL ka pyni shai ba la ai jingiarap palat pud ia kane kompani.
Ka kaiphot jong ka CAG ka pyni ruh ba ka MeECL ka khlem shym khot tender bad ka la shu iakren beit bad ka GEPL na ka bynta ban die bording ha ka dor T. 1.95 pisa shi unit.
Ka MeECL ka khlem shim lah ban iateh halor ban iasam markylliang bad ka GEPF ha ka por ba soi iaka soskular namar kane ka dei ka bynta kaba kongsan ha ka ïa die ïa thied bording.
Ka kaiphot CAG ka la kynthoh ba ka MeECL ka thied bording na ka GEPL ha ka dor T.4.75 pisa shi unit hapdeng u bnai Nohprah 2012 bad u bnai Lber 2013 bad ka la thied bording na kane kajuh ka kompani ha ka T.1.95 pisa shi unit naduh u bnai Naitung 2013 haduh u bnai Risaw, 2013 bad kane ka kompani ka la ioh nong kumba T. 13.76 klur lyngba kane ka soskular bad ka MeECL.
Ka CAG ka la ai jingtip sha ka Sorkar Jylla halor kane ka kam bad mynta ka dang ap ïa ka jubab.