Ioh mynsiem ka sorkar jylla ba kyrshan ka sorkar pdeng

Shillong, 29 Naiwieng:
Ka sorkar jylla ka la ioh mynsiem hadien ba ka sorkar pdeng ka la kyrshan ban nym pynjari ain shipai Armed Forces Special Powers Act(AFSPA),1958, ha rilum Garo wat hadien ba la pynjari da ka Kashari High Court ka jylla.
Ka Myntri Kam Pohiing ka jylla Kong Roshan Warjri ka la iakynduh dang shen ia u myntri kam pohiing ka ri u Rajnath Singh bad ia u Myntri khynnah kam pohiing u Kiren Rijiju ha nongbah Delhi.ka sorkar pdeng kham mynshwa, ka la pynpaw ba kam don mon satia ban pynjari ain shipai ha Garo Hills namar ba ka jinglong jingman kam pat dawa ban leh kumta bad ka la rai ban leit iasaid ha ka Supreme Court ia kane ka rai jong ka High Court. ka jingpynmih hukum ka iing kashari High Court ban pyntreikam ia ka AFSPA ha rilum Garo ka la pynkthah khlieh ia kane ka sorkar ba ialam ka Congress hadien ba la mih ka jingpyrshah kaba jur na ki paidbah bad ki seng, bad ki seng sain pyrthei bapher bapher ha kane ka jylla.
Ka jingpyrshah ka la ioh bor shuh shuh haba ar ngut ki mynsiem briew ki la duh ei ia ka jingim ha ki ktang suloi jong ki shipai ha Kharkuta ka North Garo Hills kata ruh haba ia ka ain AFSPA ym pat shym la pynjari bad katno tam lada pyntreikam sa da ka AFSPA.