Ioh kuna ki pulit T.67 lak na ki kali, la khang ban pynsawa

Shillong, 26 Jylliew:
Ka tnat pyniaid kali (Traffic Branch) jong ka East Khasi Hills District ka la ioh ban dain kuna haduh T.67 lak tang ha u snem 2012 na kito kiba pynkhein ia ka ain pyniaid kali.
U Additional Superintendent of Police (Addl.SP) jong ka East Khasi Hills District Bah Stiep Rynjah u la iathuh ba kane ka jingioh lum kuna ka dei khambun eh na kito ki kali ba pynkhein ia ki kyndon pyniaid kali da kaba pynieng kali beain ha ki ha ki jaka ba la mana ha kylleng ki jaka ha sor Shillong.
“Ngi ioh kuna khambun na ki jaka ba hap ha Sardar Police station bad Laitumkhrah Police station”, la ong u Addl. SP.
Ka jingioh kuna ka dei ruh na kito kiba pynheh jingsawa (silencer) da kaba pyndait da u tyndong pynmih tdem kali, ki light kali ba pynthaba khmat ba ktah ia kiwei, bad ban tem jingrwai da ka sur ba pynkhih kum u jumai la mana. “Kum ia kine, lada lap ne don ba iohi ne ioh jingtip pyntip sha ngi ban ngin”, u la ong.
U la ong ba kino kino ki kali kim dei ban pynkylla ia ka kali kaba shna da ka kompeni khamtam ka sur jingsawa, hynrei dei ban ieh beit kumta lait ban pynbha briew ia ka kjat (tyre) ki bym don jingktah ia kiwei, lah ban leh.
U Bah Stiep u la iathuh ba ki kali kiba iaid ha ka nongbah Shillong kam duna ia ka 10 hajar ha ka shi sngi bad bunsien ka la long ka jingeh ia ki pulit pyniaid kali kaba dang duna briew bha. “ngi don tang 235 ngut ki pulit pyniaid kali tang ha Shillong bad uwei uwei u pulit u hap ban peit haduh 5 hajar tylli ei ei ki kali”,la ong u Bah Rynjah bad bynrap ba kane ka long ka kam kaba eh than ia ka tnad pyniaid kali.
Ki jingpynher kali ha Sor kam dei ban palat ia ka 40 km ha ka shi kynta bad ha ki jaka ba don skul kam dei ban palat ia ka 20 km ha ka shi kynta. ‘Kito kiba iaid palat ngin bat beit bad ngin pynshitom katkum ka ain, u la ong.
U Addll. SP u la iathuh ba ka tnad pyniaid kali ryngkat bad ki bor shnong ki la buh da ka jingmana ban pynieng kali pathar kaba la wanrah ia ka jingsahkut. Kane ka la long kum ha ka thain Mawkhar, Jaiaw,Wahingdoh bad ha kiwei ki jaka, la buh jingmana ha ki katto katne ki jaka, u la iathuh bad kito kiba pynkhein kin shah pynshitom ha ka ain.
Ka jingsahkut kali kumba ka long mynta ka jur eh ha kip or ba long skul bad ba wai skul bad ruh ha ka por ba long trei namar ba ki briew kim kham treh ban shong kali ne bus hynrei ki sngew tynnad ban leit skul da kali lajong.