Ioh kem ki pulit ia u nongkhaïi drok ha ryngkat 13.66 u drok, ba suba ba u dei u Heroin

Nongstoiñ: U wei u samla uba la tip kyrteng kum u Kornelius Khardewsaw 25 snem na ka shnong Mawshong Khyndew u la ngat noh ha ka kti jong ki pulit halor ka jingdon kti ban khaïi drok hapoh ïew Nongstoiñ.

Ia u tei u samla la ioh ban bat nyngkong da ki VDP bad ki bor pyniaid shnong hadien ba ki la suba jur ba u lah ban dei u nongkhaïi drok bad hadien ba kila ioh ban bat ki la pyntip ruh sha ki pulit ba dei peit ia ki kam drok ha Nongstoiñ. Ki pulit hadien ba poi ha ki la pynlong ruh ia ka jingkhynra ha katei ka jaka bala ioh ban bat ia u tei u samla bad kila talasi ruh ia u ha kaba kila lap ruh ia u drok powder u bala suba ba u lah ban dei u Heroin haduh 13.66 grams. Hadien ba ki pulit ki la lah ban pyndep lut katkum ki kyndon jong ka NDPS, ki la rah noh ia u tei u briew ban pynlong ia ka jingtohkit bniah bad ha ka jingtohkit u tei u Kohdeng u la phla ruh ba dei u ba khaïi ia kitei ki drok bad u ba dih ruh ialade ha kajuh ka por. Ki pulit ki la register ruh ia ka case katkum ka case number 37(4)19 U/s 21(b)/27  NDPS Act bad la kem noh ia u Kohdeng bad ka jingtohkit halor katei ka bynta ka dang iaid shakhmat.