Nongstoiñ: Kum shi bynta ban khang lad ia ka jingjyllei jong ki kam sniew bad kam beaiñ ha ki bynta jong ka ïew Nongstoiñ bad ban wanrah ruh ia ka jingshngaiñ ia ka iaid ka ïeng jong ki paidbah bad nongshong ïew ka ophis jong u Superintendent of Police jong ka West Khasi Hills District ha ryngkat ka jingiatreilang jong ki Senglongkmie, ki VDP bad ka ophis jong u Syiem ka Hima Nongstoiñ mynta ka sngi ka 10 tarik u Kyllalyngkot ki la pynlong ia ka jingkhynra kaba kynsan kynsan ha baroh kawei ka ïew Nongstoiñ.
Ia katei ka jingkhynra la ialam da u bah B.K Jana DSP ka WKHD ha kaba la phiah kynhun haduh lai kynhun kata kynthup lang ia ki pulit ki VDP bad Senglongkmie ha kaba kitei ki kynhun ki la iaid la ka jong ka jong ka lynti ban rung shapoh jong ka ïew Nongstoiñ na ka bynta ban pynlong ia ka jingkhynra ha ki bynta bapher bapher jong ka ïew.
Ha katei ka jingkhynra ki pulit kila ioh ban kem noh ar ngut ki briew kiba kynthup ia u wei u bala tip kyrteng kum u Bayan Kharbani 25 snem ka arta na ka shnong Nonglwai bad na ka met jong u ki pulit kila ioh ban kurup haduh 10 bilor ka kyiad phareng ryngkat u wei u thyrnia u bala suba jur ba u dei u thyrnia ban injek drok, katba ia u wei pat la tip kyrteng kum u Slondarly Khardewsaw 27 snem ka arta na ka shnong Mawkaton bad na ka met jong u ki pulit kila ioh ban kurup haduh 19 bilor ka kyiad phareng.
Katkum ka jingiathuh jong ki katto katne ngut ki nongshong ïew la ong ba ki briew kiba ju mlien ban leh ia ki kam sniew kila ioh lad ban phet krad noh wut wut na ki bynta jong ka ïew Nongstoiñ tang mar ia iohi ia ki pulit bad namar ba kadei artad ka sngi ïew heh Nongstoiñ la shitom ban lap dien ia kiba bun kiba la ioh ban phet krad noh.
Shuh shuh ha katei ka jingkhynra la sakhi ruh ia kiba bun tylli ki ïing jah kiba la jot rathai bad ki bym pyndonmkam shuh kiba la dap satnag da ki jaboh jabaiñ bad katkum ka jingiathuh ki nongshong ïew la ong ba dei ha kiba kum kitei ki ïing jah kiba don ha ki bynta jong ka khlieh ïew ki briew ki ju shim kabu ban leh ia ki kam sniew ba lai phwew jait.
Haba iakren bad ki nongthoh khubor hadien katei ka jingkhynra na ka liang jong u bah B.K Jana u la ong ba kaba la pynlong ia ki ryngkat ki VDP bad Senglongkmie ban leit khynra kyndit kyndit ia katei ka ïew kadei ruh hadien ba ki pulit kila ioh pdiang ia shibun ki jingujor na ki paidbah bad nongshong ïew halor ka jingnang jyllei jong ki nongkhaïi kyiad beaiñ bad kumjuh ki nongkhaïi drok ha ki bynta jong ka ïew Nongstoiñ.
Shuh shuh u la iathuh ruh ba katei ka jingkhynra da ka jingiatreilang jong ka tnad pulit bad ki VDP lem bad ki Senglongkmie ha ki bynta ka ïew Nongstoiñ ka dang dei ka sien kaba nyngkong bad ka long ruh kaba jop watla kim shymla ioh kem bun ngut ki briew kiba leh kam sniew bad kam beaiñ hynrei u la ong ban a ka liang jong ka tnad pulit kan iai buddien bad kan iai bteng ban pynlong ia ki jingkhynra khnang ban tehlakam ia ki jingsniew bad ruh ban wanrah ia ka shongsuk shong shngaiñ.
Wat ym khynra Tang ka kyiad ka nongstoin kadri ka jaka ba la kynrei u drok haduh katta katta,trei shitom ban rat diengkhong ia u drok ym ka kyiad