Shillong:Kan long ka sngi sah kynmaw ha ka histori ka Ri-lum Garo ba ka thaiñ kala ïoh mynta ïa ka Raj Bhavan ka ba-ar ha Jylla, kaba la plie paidbah mynta ka sngi Thohdieng da u Lat ka Jylla Phagu Chauhan lyngba ka kor online.
Ka Meghalaya ka don ïa ka Raj Bhavan ba la tei naduh ka por jong ka Sorkar Bilat ha sor Shillong bad da kane ka Raj Bhavan ba thymmai, ka Meghalaya kala don ha ka thup ha ryngkat ki katto katne ki Jylla ka Ri, kiba don palat ïa kawei ka Raj Bhavan.
Ki kynrem ki lyndan kiba la ïadonlang ban sakhi ïa kane ka sngi ki kynthup ïa u Myntri Rangbah ka Jylla Conrad K Sangma, Lamphang ka Ïingdorbar Thomas A Sangma, MP ka Tura Agatha Sangma, Myntri ka Tnat PHE Marcuise N Marak, ka Kmie u CM nalor ki heh ki haiñ bad ki Ophisar ka District.
Katba u Lat ka Jylla Phagu Chauhan ula ong ba ka jingpyndep ïa ka Raj Bhavan ha Tura ka dei ka sakhi ïa ka jingkut jingmut jong ka Sorkar ban pynïaid sted ïa ki kam pynroi, u Myntri Rangbah Conrad K Sangma ula bynrap ba kane ka pyni ïa ka jingïalong kawei hapdeng ki paidbah ka Jylla.
Kane ka Raj Bhavan ba thymmai ka don ha ka shnong Danakgre jong ka sor Tura bad la tei ïa ka ha ka jinglut ba T. 24.1 klur, ha ka jaka ba heh 28.45 acre.
“Nga kmen shibun ba mynta ngi la plie ïa kane bad kaba pynsngewhun eh ka dei ba tang ha kine ki khyndiat sngi ban wan, ka President ka Ri jong ngi, Droupadi Murmu, kan wan bad sah ha kane ka Ïingsah u Lat. Bad ha ka sien ba nyngkong eh ha ka Jylla jong ngi ba ka President ka Ri India kan wan ïuhkjat ha Tura. Kane ka shitaïew ban wan kan dei ka jingkyrkhu kaba khraw bha ïa ka Jylla jong ngi bad khamtam eh ka Tura bad ka Ri-lum Garo,” ong u Conrad haba ai jingkren.
ka la bha eh ba ki dongmusa kin iohnoh la ka jong ka jylla lymkumta katba ngi dang ia don lang bad ki dongmusa kin thang lut ia ka ri masi bad kin die duh ia ka ri jong ngi kinleh kput bam duh lut die lut ia ka ri jong ngi sha ki bar jylla ka bha ba kin iohnoh la ka jong ka state