Ki paidbah ka shnong Mawmluh, Sohra ki la iamih paidbah ha kane ka sngi Saitjain ban shim kabu ia ka jingtip na ka prokram ba la wan rah ha katei ka shnong.
Ia kane ka prokram ban ai jingtip sha ki paidbah, la pynlong da ka ophis jong u SDPO (Sohra) hapoh ka jingialam Bah Ian Onel Swer ryngkat ka jingiatreilang bad ki samla pule ka Bar Association jong ka Shillong Law College bad ka jingiatrei lang ka shnong Mawmluh.
Ki nongshong shnong ka Mawmluh ki la iamih shit rhem ban wan shim bynta bad ban ia sngap ban ioh jingmyntoi.
Ki stad ba dei ha ka lain bapher bapher ki la wan ban pynshai sha phang kaba iadei bad ka Lok Adalat, ka hok ki nongthied, ki kam thom bor pyrshah ia ki nonrtrei iing, ki kam batbor ia ki kynthei, ka jingtip halor ban pyndonkam ia ka RTI, ki kam iakajia majia, ki kam ba iadei ka jingaksiden, ban ujor FIR bad kiwei de.
Ki paidbah kiba la wan ban shah shkor ki la ioh jingmyntoi shibun na kum kine ki jaitprokram. Ha ka prokram la iadon lang u SDPO (Sohra), ki ophisar ka Sohra Police Station, u President Student Bar Association Shillong, ki Lecturer jong ka Law College Shillong ryngkat ki khynnah pule jong kane ka college, u Sordar bad Rangbah Shnong Mawmluh bad ki seng baroh ki ba hap hapoh shnong Mawmluh.
Phi don ban ong eiei?