Ioh jinghikai ki nongrep ha Nongkhroh

Shillong, 18 Rymphang:
Palat spah ngut ki nongrep haka shnong Nong khroh kaba don hapoh ka Thadlaskein Development Block kila ioh jinghikai mynta ka sngi haka training kaba la pynlong da ka Shaphrang Farmers Group Nongkroh ha ryngkat ka jingiarap jong  ka seng Society for Urban and Rural Empowerment (SURE).
Ia kane ka training kaba shisngi la la kyrshan pisa da ka ophis jong u District Planning Officer, West Jaintia hills District bad ia ki jingai jinghikai la ai da ki riewshemphang naka KVK Jowai. Namar ba ka jingangnud jong ki nongrep ha kane ka shnong ka long ban ioh jinghikai shaphang ki ar jait ki mar rep kiba kongsan jong kane ka thain, nyngkong la ioh ia ka jingai jinghikai na I kong Banylla Kharbamon iba la hikai kumno ban rep khambha ia u sohsaw bad u syieng. I kong Kharbamon ila batai bniah bad batai shai shaphang kumno ban rep khambha ia mar rep khnang ba ki nonngrep kin iohnong.
Hadien la ioh ia ka jingai jinghikai da i kong Ridalang Rngad iba batai bniah shaphang ki jait jingpang bad ki kynja khniang kiba lah ban pynsniew ia kine ki jingthung bad ila ai jingmut ruh kumno ban iada ia kine ki mar rep na kiba kum kine ki jingpang bad ki khniang. Hadien jong kawei pa kawei ka jingai jinghikai la ioh ruh ia ka jingkylli bad jingpynshai na kine ki riewshemphang bad ki nongrep khamtam ki kynthei kila buh ia ki jingkylli kiba bun ban ioh jingtip kumno ban pynbha iaka rukom rep jong ki.
Ha kane ka jingai jinghikai la ioh ruh iaka jingkren na u Rangbah Shnong ka Nongkhroh Adrian Dkhar, u Romeo Nongspung bad kumjuh ruh u ma W. Shylla na ka Meghalaya Basin Development Agency uba la pynshai shaphang ka Integrated Basin Development and Livelihood Promotion program (IBDLP). Ia ka jingialang la pyniaid da u H.H.Mohrmen president ka SURE.
Ha kane ka juh ka sngi ka SURE kala pynlong iaka jingpynshai paidbah ha kaba ia dei bad ka jingpang HIV AIDS haka shnong Mupyut kaba don hapoh ka Amlarem Sub Division. Ia kane ka program la kyrshan da ka Meghalaya AIDS Control Society (MACS) bad la ioh ia ka jingkren na ka kong Malvy Tariang kaba long ka Counselor jong ka MACS haka Civil Hospital, Jowai, u Rangbah Shnong ka Mupyut u ma Hamdon Phawa, ka kong Dami Mohrmen bad ia ka jingialang la pyniaid da u ma B.S. Shylla Secretary ka SURE.