Ioh iingbishar ka Amlarem

Shillong,12 Nohprah:
U Justice Uma Nath Singh, Chief Justice ( Acting) ka Meghalaya High Court mynta ka sngi u la plie paidbah ia ka kashari jong ka Judicial Magistrate 1st Class ha Amlarem Sub Division. Haba kren ha katei ka sngi, u Uma Nath Singh u la ong ba ka jingplie ia katei ka ing bishar ka dei shi bynta na ki kam ka sorkar ban ia phiah ia ka Executive bad ka jingbishar ha la ka jong ka bynta. U la ong ba katei ka jingiaphiah bynta ka wanrah ia ka jingbishar hok kaba iar bad shen ki paidbah ka Amlarem kin iohi ia ka jingmyntoi jong ka.
U la kren ruh ia ka jingdonkam ka rep ka riang ban ban kam trai biang ia ki khlaw ki btap bad bad ki wah ki um kiba la duh noh, bad u la kyntu ia ki nongialam shnong ba kin leh eiei noh halor katei ka bynta. Kiwei pat kiba la donlang ha katei ka jingialang ki long u Justice T.N.K Singh, nongbishar jong ka High Court ka Meghalaya. U TNK Singh u la kren ia ka jingdonkam ki district Council ban pynneh pynsah ia ka riti ka dustur tynrai, bad u la ong ba ka ing bishar ha Amlarem kan pynsted ban ai ka jingbishar khnang ba u paidbah un ioh jingmyntoi.
U bah S. Mukhim, u MLA katei ka thain u la ong ba kane ka ing bishar kan pynsted ban ai ka jingbishar ia ki kiba bun ki case kiba dang sahteng. Kiwei pat kiba la ai jingkren ki long ka kong B. Giri, District & Sessions Judge, West Jaintia Hills District, u bah K. Pohshna, President SKRS (War Jaintia) bad u bah C.S Kyndiah, President, Jaintia Hills District Bar Association. La pyniaid ia katei ka jingialang da u bah D.M Wahlang, D.C, West Jaintia Hills District bad la ai khublei pynwai da u bah A.W Lanong, Judicial Magistrate 1st Class ka Amlarem Sub Division.