Shillong 20 Lber: Ka seng Hynniewtrep National Youth Front (HNYF) Southern Border Area haryngkat ka jingsynranlang na ka East Khasi Hills mynta ka sngi palei, ka 20 Tarik u Lber 2025, ka la sei madan ia ka RTI kaba la ioh ha kaba ia dei bad ka skul Dangar Dombah Border Area Upper Primary School halor ka rukom thungkam hikai ia u wei u bar jylla ha katei ka skul ka badei ka Deposit Skul.
Ka seng ka la pynpaw ia ka jingpyrshah jur halor kane ka jingioh hikai utei u bar jylla uba lah da ki phew snem mynta u hikai bad u ba ioh ban hikai ia ka ktien Hindi.
Ha ka jingiakren bad ki lad pathai khubor ha Shillong Press Club mynta ka sngi na ka liang u bah Kyllang S Thongni uba dei u President HNYF SBA u la ong ,ba ka jingthep kam ia une u bar jylla sha katei ka skul, kadei beit ka jingthungkam sop sop na ki bor ba halor.
U la ong, ba une u bar jylla uba la shu thungbeain ban hikai ha katei ka skul, um nang ban kren English bad um lah ban kren da kiwei kiwei ki ktien lait na ka ktien Hindi bad kane ka don ka jingeh ia ki khynnah namar kim sngewthuh ruh ia ka jinghikai jong une.
Kidon ruh ki nonghikai ki ba shu ai bylla sngi ia kiwei ki briew ban hikai ha kino kino ki skul. Kumta ka seng ka la ong,ba nangne shakhmat kan sa iai buddien bad ban leit kyndang beit naphang.
“Nalor katta ruh ka seng ka la iathuh, ba ha katei ka skul, ka badei ka Deposit school, ba la pyniaid da ka Managing Committee ka Shnong Dangar, ba ka la lap ruh ba ïa ka scheme Midday meal kaba dei ka scheme ban ai ja ia ki khynnah skul l, la lap, ba ia ki khynnah skul khlem pat ai ka ja wat tang shisien bad wat ia ki nongshet ja ha skul kim tip mano ba dei”.
ka seng ka la buh jingkylli mano ba donkti ban bam lane ban bamsap namar wat ia ka pisa na ka scheme midday meal la sei kaba kot da ki lak ha ka shisnem.
Ka seng lyngba u president u Bah Kyllang Thongni u la ong ba lada ka tnat pule puthi kam pynbeit ia kane ka kam ka seng kam banse ban leit tit jingkhang ha iingbishar.
Kumta ka la maham da kaba ong, ba kan nym shongthait, hynrei kan iai buddien ban kyndang ia kiba kum kine ki skul hapoh ka thain bad kan sa lap lut ia ki jingshisha.
Phi don ban ong eiei?