Ioh elaka ka Sumer Patorship

Jowai, 24 Lber:
Ka Sumer Patorship kaba don hapoh ka Raliang Elaka kaba dei ruh tang ma ka, ka Patorship kaba la ithuh da ka JHADC naduh u snem 1968, mynta ka sngi ka iing Dorbar ka la rai ban mynjur ia ka Resolution ba wanrah da u CEM ka JHADC u ma Thombor Shiwat na ka bynta ban ai Elaka noh ia ka.
Ia katei ka Elaka ba thymmai la tip ia ka kum ka Sumer Elaka kaba don palat 10 hajar ki nongshong shnong bad kaba kynthup ia ki 17 tylli ki shnong.
Ki shnong kiba hap hapoh katei ka Elaka Thymmai ki kynthup ia ka shnong Pala kum ka head-quarter, ka Kseh, Umkyrpong, Mooriap, Lakasein, Samasi, Mynthlu, Krem Myrsiang, Kyrluh, Jalapher Bri-Sumer, Mulait Bri-Sumer, Mookhain, Mynthning, Shyrwang, Larket, Khahnar bad ka Mooknor.
U ma Thombor Shiwat, haba kren hapoh ka iing Dorbar u la pynpaw ba riew rangbah na ka thain Sumer ki la dawa la slem bha ban ioh noh ia la ka Elaka bad hadien ba ka EC ka la bishar bniah bad ka la shem ba ki paidbah katei ka thain ki ia kynduh jingeh shibun ban wan shaduh sha Raliang na ka bynta ban pyndep ia ki kam ki jam jong ki ha kaba iadei bad ka Ophis u Dolloi.
U ma Bison Iano, MDC ka Raliang ruh u la pynpaw ia ka jingkmen halor ka jingrai ban pynkha ia ka Sumer Elaka. Utei u MDC u la iathuh ba ia kane ka kam la leh ruh da ka jingiasngewthuh jingmut ki bor Elaka jong ka Raliang bad ki Rangbah jong ka Sumer Patorship (Sumer Elaka mynta).
Na ka liang u ma Richard Singh Lyngdoh ruh u la ai ka jingiaroh ia ka EC kaba la wanrah ia katei ka mat iakren bad u la kyntu ia ka EC ban pynbiang sa ia u pud u sam ba janai jong katei ka Elaka khnang ban lait na kano kano ka jingiapher jingmut hapdeng ki nongshong shnong kiba na ki elaka ba marjan.