Ioh COVID-19 sa kawei ka briew ba la noh rta ha Ri Bhoi Sepngi

Nongpoh: Hadien ba la don kawei ka riew kynthei kaba la noh ka rta na ka shnong Ampata, ka shnong kaba hap hapoh ka Jirang C&RD Block, ka la paw ba ka la ioh ia u khniang jingpang Corona Virus ne COVID-19, hynnin ka miet ka District Magistrate jong ka Ri Bhoi, ka la pynbna syndon ia ki shnong kiba marjan bad katei ka shnong ba kin hap ha ka Containment Zone.

Kitei ki shnong kiba la hap hapoh ka Containment Zone, kaba la sdang naduh ka 14 haduh ka 28 tarik mynta u bnai, ha kaba ki shnong kiba la ngat ha katei ka thup, nalor ka Ampata, kiwei pat ki shnong ba marjan kiba kynthup Umshru, Sakunijira bad Halher, ka thain Umsohbar, Warmawsaw ha khappud ka Meghalaya-Assam.

Nalorkata ha kitei ki shnong la pynjari ruh da ka kyndon 144 CrPC, kaba long ruh kum ka jingmaham ia ki paidbah ba ki dei ban mih na ki iing ki sem jong ki, lait noh tang ha ki kam kiba kyrkieh kum ha ka pang ka shitom lem bad kiwei ki kam ki bym lah ban kiar.

Ka jingpynjari ia kitei ki kyndon ain ha katei ka shnong ba la don kaba la ngat ia u COVID-19 lem bad ia ki shnong ba marjan, ka long ban tehlakam ia ka jingsaphriang stet jong u khniang jingpang COVID-19.