Shillong: Ki dkhot jongka KSU hynnin ka sngi ki la ioh ban bat ia ka longing jong u Azimuddin Choudhury. Ia une u briew la ioh ban bat nyngkong da ki dkhot jong ka KSU Balat – Dangar Area Unit ha iew Balat hadien ba la i shankhmat ia ka iaid ka ieng bad ka rukom wan leh doktor jakoid jong u ha iew Balat.
Ha ka jingtohkit u la iathuh ba u la poi wan sah ha kane ka jaka da ka jingiarap jong u Mulor / Headman jongka Shnong Jamadwar.
Kham hadien ki dkhot jongka KSU Ranikor Circle, ki la leit ban hiar ban tohkit ia une u briew bad ka iing ka sem ha kaba ki la iathuh ba ka jingwan jongki sha kane ka jaka ka long hadien ba ki la shah kyntait na ka thup jongka NRC ha Assam bad ka jingthmu jongki ka long ban wan long nongshongshnong thymmai noh ha kane ka Jaka lyngba ka jingiarap jong u Mulor ka Jamadwar. Ka seng kham hadien ka la pyntip noh sha ki pulit jongka South West Khasi Hills District ha kaba ki pulit ka Gumaghat ki la wan shaw na Jamadwar hynnin ka sngi 7 tarik.
Halor kine kiei kiei, ka seng ka dawa na ki bor district bad ki bor pulit jongka South West Khasi Hills District ban shimkhia ia kine ki kam bad ba ki dei ban peitngor ia ka iaid ka ieng ki bym dei trai jylla khamtam mynta hadien ka Final List jongka NRC ha Assam. “Ngi kyntu ia ki bor district ban shimkhia halor kane ka mat jongka jingwan rung kyrthep ki mynder ha ka Thain bad wat pynbor ia ka seng ba kan leh hi iaka kamram”, ong ka kyrwoh na u samla Forwardman Nongrem President KSU South West Khasi Hills District.
Phi don ban ong eiei?