Shillong: Ha ka janmiet jong ka 21 tarik u Jylliew 2021, hadien ba ka KSU Upper Shillong Circle ka la ioh jingtip, na ki katto katne ki nong shong shnong ka thain Upper Shillong ba ki don ki kynhun jong ki thuk thuk bad ki kali kiba khlem don ia ka Car pass ki ba shang makia ha ki thaiñ ryngkat ka ïadih kyiad harud surok bad ia ieng lymbrum shi jaka kynthei bad shynrang khlem jingda khmut (mask), ka seng ka lah thwet ia kine ki briew ban tip ia ka jingshisha ïa kitei ki briew kiba pynkhein ïa ka kyndon pynjari ka Sorkar, ban teh lakam ïa ka khlam COVID-19, kumta da ka jingtrei shitom ki dkhot ka Seng ka laioh ban bat noh ia kawei ka kali na jingkieng Umshyrpi kaba don ia u number AS 01 AW 3676 bad hapoh kane ka kali la ioh bat ïa 5 ngut ki shynrang bad kawei ka kynthei kiba dei ki bar jylla suda, bad kitei kikam ialade ba ki sah ha Mawbah bad Last stop Laban.
Hadien ba ka seng ka la peit bniah ia ka Video kaba la ioh na ki katto katne ki briew kiba ujor sha ka Seng, ka la lap ia ka jingshisha ba katei ka kali shisha bad ki dei ki juh ki briew ki dei ki ba ieng ryngkat bad kiwei pat ki Scooty bad kawei kali ki bym shem la paw ia u number ha ka video, kumta ka seng ka la leit ban aiti noh ia kine ki briew sha ki bor jong ka aiñ ban pynshitom tyngeh ia ki katkum ka aiñ.
Shuh shuh mynta ka sngi ka KSU Upper Circle, ka la leit ban ai syndon da ka ejahar ha Mawngap Police Station pyrshah ia kitei ki briew, ka seng ka la aiti sha ki bor ka aiñ bad kumjuh ruh ia kiba la lait phet namar ka jingpynkheiñ jong ki, ïa ki protocol ka COVID-19 bad ki jingpynbna ka office jong ka Deputy Commissioner jong ka East khasi Hills District bad kumjuh ruh ka jingdih kyiad khlem akor ha surok bad khlem burom shuh wat ha ka por mynsngi mynshai.
Na ka liang ka seng ka dawa ïa ki bor jong ka aiñ ba kin shimkhia kan kem lut ia baroh kitei ki briew, kiba la pynkheiñ ain kum ba la paw ha ka video bad ki dur ba lah ioh ban ring da ki katto katne ki nong shong shnong. Namar ka jingleh jong kine ki bar jylla ka la pyntieng pynsmiej ia kiba bun ha kum kane ka por ba ka sorkar, ka pynlong ia ka jingkhangdam ban lait na ka jingsaphriang u khniang jingpang Corona, hynrei kine pat ki ioh ban shang sahuh ha ryngkat ka jingdih buaid, bad katei ka jingleh jong kine ki briew ka la nang pyn artatien bad ka la nang pynmih shuh shuh ka jingkynthoh ia ka tnat pulit, na ia ki nongshong shnong ka thaiñ ki bym shem la ioh shuh ban leit ban wan namar ba ki kloi ban ai ka jingiatreilang bad ki bor sorkar ban lait na ka jingphriang kane ka khlam jingpang, pynkut ka kyrwoh kaba laphah na u Samla Shelkitbok Kharbani, General Secretary KSU Upper Shillong Circle.
Phi don ban ong eiei?