Ioh bat ia arngut ki nongkhaii droks, ha ryngkat u Heroin ha kad liengsuiñ u ba shongdor kumba 98 klur

Katba dang iaid ki sngi ki por, ka jingkynrei ki kam khaii droks ruh ka la nang jyllei bha ha kaba arngut ki briew kiba dei na ka Ri Zambia ki la shah bat noh ha ka kad liengsuiñ jong ka Indira Gandhi International Airport kaba don ha New Delhi. Na kine ki arngut la ioh ban kurup ia u droks Heroin uba shongdor haduh 98 klur tyngka eiei.

Katkum ki tyllong khubor na ka Sorkar Pdeng ka iathuh ba kitei ki arngut ki la wan poi na Johanessburg, ha ka 15 tarik u Iaiong 2021 hynrei ki la shah bat noh ha ki briew jong ka tnad Customs ha katei ka kad liengsuiñ kaba don ha New Delhi.

Hadien ba la peit bniah ia ki synduk ba ki lah rah la shem pynban ba ki la buhrieh ia ki kynja jingdih pynbuaid lane droks ha kaba la suba jur ba u dei u Heroin.

Haba la thew ia utei u jingdih pynbuaid Heroin ba la rah da kitei ki arngut, ka jingkhia ka long kumba 14 kilo bad u ba shongdor kumba 98 klur tyngka. Ia kitei ki arngut la kem noh bad la pynngat ia ki ha ki kyndon jong ka NDPS Act.