Jowai, 15 lyngkot:
Ka Dukan jong ka Kong Meris Pohdweng ba na ka shnong Trangblang ba hap hapoh Amlarem ka la julor lut khait haba ka ding kaba klang bad ishyrkhei ka la bam duh ia katei ka dukan kaba I shong die man la ka sngi ban kamai ja kpoh ia la ki khun bad ka iing ka sem. Kane ka jingjia ba sngewsih ka la jia ha ka por 3 baje ha ka por nohphai sngi jong ka sngi u Blei,ha kaba ki briew ki dang shu mih na ka jingiaseng shi baje.
Namar ba ka dei ka sngi u Blei, kiba bun ki paidbah ki iamih ban wan sha kata ka jaka ban tem ia ka ding ha ka por ba ka sdang. Hynrei haba la pyrshang ban tur shajan kata ka Dukan,la pyrta da ki para marjan ba ki don artylli ki buiam shet jingshet hapoh dukan. Halor kata ka daw ki paidbah ba iamih kynthei bad shynrang kim shlan satia ban tur shajan bad ki rangbah ki la maham ban tur,ban lait na ka jingmynsaw.
Kane ka jingjia ka la long kum ka jingpeit kai na jngai ryngkat ka jingtieng. Hadien kumba 15 minit eiei la mih ka jingbthei kaba la pynkhynniuh bad pynkyndit ia baroh haba ki lyer shet, ki la ia bthei.
Ka iing ruh baroh kawei ka la shah bam duh bad ki tiar ba rem dor kum ki refrigerator, ki tiar shet electronic bad kiwei kiwei ki tiar die baroh ki la shah bam shngiam ha ka jingklang ka ding.
Kane ka dukan ka la kylla dpei khlem ioh shuh wat tang iwei I mar i barit. Khlem pat ia kren bad i trai dukan la shu antad ba ka jingduh ka la long kaba la kot da ki lak tyngka.
Ha kane ka jingjia ym shym la pyntip sha ki pulit pynlip ding ba don ha Amlarem, namar kan ym don jingmyntoi namar ka jngai ka jaka. Na ka liang u nongpathai ia kane ka jingjia sha ki lad pathai khubor, um lah ban tip na ka liang ki nongpeit ia ka shnong ka thaw kumno ki ia pynbeit ha ka jingiadei bad ki jingiarap na ki bor sorkar.
Phi don ban ong eiei?