Ingkhong ka trok, ba kawang petrol bomb hajan DCIC

Shillong, 7 Jylliew:
Mynta ka sngi kawei ka borewell trok ne ka kali ksam um, kaba don ia u number TN-45AS 0599 ka la kem ding ha ka por kumba 12.30 mynta ka nohphai sngi. Katkum ki khubor ba la ioh lum la iathuh ba ka jingkem ding jong katei ka trok ksam um la suba ba kad ei na ka jingshah kawang petrol bomb ha ki briew ki bym lah ban ithuh satia namar ha katei ka por ym shym la don mano mano ruh ha katei ka jaka.
Katei ka truck ka dei jong u trai ka Madras Cafe u ba dei u bar jylla, u Bonus Ratan, ka la ingkhong lut ha ki bynta ba shakhmat bad hadien shikynta ei ei lawan poi ki pulit pynlip ding bad tem ia ka ding kaba klang.
Katkum ka jingong u Superintendent of Police (Crime) u Bah Vivek Syiem, kane ka jingjia ka lah ban don ka jingiadei bad ka jingiakhih pyrshah ia ka lynti rel kaba la khie na Ri-Bhoi district naduh ka 27 tarik Jymmang. U S P u la iathuh ba ia kane ka truck la pynieng marjan bad ka kudam jong u Bah P Muktieh, ha phyllaw jong ka ophis District Commerce & Industries Centre, East Khasi Hills Shillong.
Katei ka jaka kadei hapoh ka jingpeit jong ka Pasteure Beat House bad na ka liang u Bah Vivek u la ithuh ba haduh mynta ka por janmiet ym pat don satia ka jingujor ejahar na ka liang u trai jong katei ka kali, hynrei ka jingtohkit halor kane ka jingjia ka la iaid ban iohkem ia ki runar ba donkti.
Lah ban kdew ba kane ka jingkem ding jong katei ka truck ka long ha ki kynta ba la pynlait ia ka kyndon 144 CrPC kaba la pynjari da u Deputy Commissioner ka East Khasi Hills naduh ka 5 tarik Jylliew, naduh ka por 6 baje janmiet haduh ka por 5 baje mynstep.
Ha kawei pat ka khubor, U Deputy Commissioner, East Khasi Hills District, ula pynjari ia ka kyndon 144 Cr PC, kaba maham ia ka jing ia lum lang jong palat san ngut ki briew ha kajuh ka jaka, ban rah ia ki tiar pynmynsaw ban rah petrol ha ki bitor, ki jri bad kiwei ki jingrah bad ban iaid sharum shaneng bad kitei ki tiar pynmynsaw. Katei ka hukum, ka trei kam naduh ka por 6baje mynmiet haduh 5baje mynstep bad ka daw, ka long namar ba ki don ki kynhun kiba pynthut ia ka leit ka wan, ka suk ka wan ha ki bynta jong ka District, ong ka khubor.