Ingkhong, ka ïing ha Umtyrnga, julor da ki phew lak

Nongpoh: Ka la don kawei ka jingjia pluhiing, hynnin ka step ha ka por 9 baje ei ei ha shnong Umtyrnga, Ri-Bhoi bad ha katei ka jingpluh katei ka iing, ka la pynjulor hi khait ia baroh ki jingdon jingem hapoh katei ka iing, kaba kynthup ia ka pisa, ka Ksiar ka ksah lem bad kiwei ki jingdon jingem.

Katei ka iing kaba la shah kemding kynsan hynnin ka step, ka dei ka iing jong ka Kong Aibha Tangsang bad u Bah Wansi Khongjoh, ha kaba ka daw kaba la pynlong ia katei ka iing ba kan pluh, ka dei namar ba la don ka jingthut ha ka bording hapoh katei ka iing kaba la kem ding kynsan, da kaba sdang na kawei ka bynta bad ka sa pur ha baroh ki bynta ha katei ka iing.

Ha katei ka jingjia ba sngewsih ia katei ka Longiing, ka la shu don tang ka jingjulor ia baroh ki jingdon jingem, hynrei donbok pat ba ym shym la don pat kiba la mynsaw na katei ka jingjia.