Ingkhong, da ki hajar tylli ki tynrai siej ka RBTEDF

Nongpoh:Ki la don kumba 2000 tylli ki tynrai siej ïa kaba la thung da ka Ri-Bhoi Tourism & Environmental Development Forum (RBTEDF) ha kawei ka khlaw kaba don ha shnong Umskun ha Ri-Bhoi, ki la ingkhong khaid bad kata ka dei namar ba la don ki riew dusmon kiba la leit ban thang dusmon ïa katei ka khlaw kaba la thung tynrai siej.

Haba ïadei bad katei ka jingshah thang dusmon ïa katei ka khlaw ba ka RBTEDF ka la thung ïa kitei ki tynrai siej, na ka liang u Bah Plielad Tiewsoh Chairman ka RBTEDF, u la ong ba katei ka jingshah thang ïa katei ka khlaw, ka la jia ha ka miet 12 tarik mynta u bnai, ha kaba ka ding kala klang ban bamduh ïa katei ka khlaw thung siej jong ka RBTEDF kaba ka dang shu dep ban thung ïa u siej kumba 4 hajar tynrai ha u snem bala dep.

Ha kawei pat ka liang, utei u nongialam ka RBDTEDF, u la ai ka jingiaroh ia ki nongrep bad ia ki briew na katei ka shnong, namar tang mar ia jia katei ka jingkem ding, ki la leit ban pynlip ia katei bad kaba la lait ba baroh ki siej ba kin ingkhong noh ha katei ka ding kaba la klang na ka jingthang ki riew dusmon.

Na ka jingiathuh jong u Bah Plielad Tiewsoh, u la ong ba kitei ki siej ki la don kumba 2 lane 3 phut ka jingjrong, kaba dei ruh ka project thungsiej bala bei tyngka da ka North East Cane and Bamboo Development Council) jong u snem 2021-22.