Ing ka trok ha Killing, kem ding ka ophis Veterinary ha Mawryngkneng, shah kem 9 ngut

Shillong, 5 Nailur:
Kawei ka trok ka la ing hadien ba la shah thang ha Killing jong ka Ri-Bhoi katba khyndai ngut ki briew ba suba donkti ban kawang maw, bad khang surok ki la shah kem haduh hynnin ka sngi.
Ki pulit ka Ri-Bhoi ki la kem lai ngut ki briew na ki jaka bapher bapher jong ka district halor ka jing kynnoh ba ki thang kali, khang surok bad kawang maw ha ka kynta jong ka pakhang surok jong 10 tylli ki sengbhalang ha ka jylla kiba dawa ban pyn treikam ia ka Inner Line Permit (ILP). Ki runar ki leh ia kane ha kynta pakhang surok ha kane ka miet sngi Balang ki la thang kawei ka trok (AS-01CC-3382), ka jong u Karnab Chowdhury ha Killing, hynrei ha kane ka jingjia, ym don ba mynsaw lait noh ka jinging khong ka kali. Kawei ka Bolero Camper (AS-03E-7175) ruh ka la shah thang ha Killing. Shuh shuh kawei ka trok (AS-01L-8869) ka la shah thang ha 20th Mile, Byrnihat.
Ha kawei ka jingjia kawei ka jeep(ML-05C-7749) jong ka MeECL ha ophis ka MeECL ha Byrnihat ka la shah thang bad kawei pat ka trok ha Umling ka la kem ding bad ka la jot.
Ki pulit ki la kam ba ki la ioh kem ia ki briew kiba thang ha ka por ba ki leh ia kane ka kam. Ha kajuh ka por, ki pulit ki la pynkhlain ia ka jingiaid pahara ha baroh ki bynta jong ka surokbah 40 ban khang lad ia ki runar kiba thmu ban leh ia ki kam runar. Kine kiba shah kem ki long u Gobarson Suting (30 snem), Thomson Lyngdoh (25 snem) bad u Shanbor Lyngdoh (32 snem).
Ka ophis ka AH & Vety., Department ha Mawryngkneng (EKH) ka la shah kawang petrol bom. Ka computer bad ki tiar nalor ka refrigerator bad ki miej ki shuki ki la ing khoit. Ki pulit ki la ioh kurup ruh ia u petrol bom bym bthei.
Ha Shillong, ki pulit ki la kem hynriew ngut ki briew kiba donkti ban khang surok bad kiba shoh pynmynsaw ia ki briew ha ka iew Polo hynnin ka sngi.
Ki pulit ka nongbah ki la ioh kem ruh ia u nongialam ka KSU u Serababel Swett hadien ba la kthong ba ki thmu ban thang taiar kali bad khang maw ha ka thain Mawkhar, Shillong hynnin ka janmiet bad uwei na Polo.
Katkum ki pulit baroh kiba shah kem ki dei ki dkhot jong ki sengbhalang kiba donkti ban leh ia ki kam runar.
Lah ban kdewba ki sengbhalang ki la khot pynlong ia ka pakhang surok kaba lai miet kynthih naduh ka 4 haduh ka 6 tarik naduh ka por 9 baje mynmiet haduh 5 baje mynstep ban pynbor ia ka sorkar ban pyntreikam noh ia ka ILP ha kane ka jylla.
Lashai ka sngi ka pakhang surok miet kan treikam naduh ka 10 baje mynmiet haduh 5 baje mynstep, bad ki sengbhalang ki la leh ia kane hadien ba la ioh ia ka jingkyrpad na ki Balang.