Imat bun kiba kwah rel mo?

B.M.Lanong
U Chief Minister Conrad Sangma, dang ha kine khyndiat sngi ula pynbna bad pan jingmut, ba lada bun kiba kwah Rel lane kiba pyrshah, un shim ia ka rai halor kata, la yn ailad ne khanglad ia ka jingwan ki Rel sha kane ka thain Khasi-Jaintia Hills. Ngam shym iohi ban don kiba pynpaw halor kane ka bynta, hynrei la iohi pynban ha ki kot khubor ba ka tnat NE Frontier Railway kaba dei peit ia kane ka kam, ka la pynbna ba kan sdang wad jaka bad thew noh ia ki, khnang ban pynpoi ia ki Rel shane.

La slem nga la iai pynpaw ia ka jingsngew jong nga, ba kan bha ba ngin pynneh-pynsah shane sha thain jong ngi, kum ka Ri-lum ba jyrngam, kaba khuid ba suba, ba pyngngad, kumba iakdew bad iaroh wat da ki briew ba nabar ruh. Sha thain ri thor (plain) Garo Hills ki Rel ki la iaid bad bun kiba la sdang iohi ia ki jingma.
Dang shen shijur ki samla Garo kiba dang dei shipara arkmie, kawei lei kaba trei Air Hostess (liengsuin), ki la shah pyniap bein da kaba sdien phasi ha Haryana.

Dang 3 bnai mynta pat, iwei i samla pule na Marngar Ri-Bhoi, ila shah pyniap bein ha ka jaka pule ha, Rajasthan, kaba la long shisha ka jingleh kaba la palat pud. Bun kiwei ki jingjia kiba kum kine, kiba jia jar-jar bad ym ju tip, namar la leh klep bad buhrieh.
Ubym shym lah buhrieh te u dei uto u nongialam ki RSS uba la wan ha Shillong dang shen, u Mohan Bhagat, uba la tymmen bad uba la pynmih ia ki kyntien, ba baroh ki nong India ki dei ki Hindu, haduh ba la kyndit bad pyrshah lut ia kitei ki jingkren jong u, namar wat ka Constitution ka ri India ruh, ha ka Par-mat (Preamble) jong ka, ka la kren shai ba ka ri India ka dei naka bynta jong baroh lang ki paid ka Ri India baiar, khlem khein jait ne niam. Hynrei ia ka jingmut te la kum lait.

Ka Manipur Ka la mad
Ka jylla Manipur ka la mad ia kiei kiba kim pat ju mad ha ka jingim, kiban sah kynmaw shi junom. Ki jingiap da ki hajar, wat kano-kano ka thma kan ym lah ban pynlko kumba la jia ha kine ki sngi.
Shane sha ngi ruh la sdang riam, haba ka Sorkar India ha u snem 2021 ka la pan ban ai jaka sah ha ki 6846 ki shnong ha ri khasi, ba kin wan shong ki nongbylla ka Survey India na ka bynta 5-6 snem, lane haduh ban da dep kam, ban thew ia kita ki kam Survey ia ka suin bneng lyngba kata ka Skim Svamitva. Lymda dei ba ki stad ki 30 ngut ki MDC ka KHADC, ban katta, shane ruh la kylla kum ka Manipur. Ki MDC ki la kyntait mardor, ba kim lah ban leh ia kane ka kam.

La buh ba, da ki phew hajar ki nongbylla nongwei kin wan shong ha ki tei 6846 tylli ki shnong tang ha ri Khasi, ym dei sha Jaintia ne Garo. Ban katta da ki hajar ki la dep thew ryngkew bad shong ing syndon. Ki kyndon katei ka ain, ki la buh jingiada lypa ia ki baroh, ba lada jia ei-ei ne kino-kino ki jingiapher jingmut, ka tnat Pynchayati Raj jong ka Sorkar India kan rai, ym dei da ki Ing Bishar Ain.
Dang ieid ki Blei, kam shym trei kam katei ka ain, namar ka KHADC ka la pynphai kylla, da kaba shu ai daw beit, ba kim lah ban leh ia katei ka kam, namar ka khyndew kam dei ka jong ka ne jong ka Sorkar, hynrei jong ki paidbah, kaba peit da ki Hima, ki Raid, ki shnong bad ki khlieh Nongsynshar.
Mynta Sa ka Rel
Lada ki Seng Bhalang kiba don da ki phew ki spah ki dkhot ki sngap jar, kan long ka jingshet ialade bad ia u paid ka Ri.
Niuma, ki lum- ki wah kin lko pom, ki mar kordor, kum u mawshun, u dewiong, ki dieng ki siej, ki lum ki wah, ka rep ka riang, kin lko kumjuh, namar khlem pat wan kita ki Rel ruh, katne la iohi ia ki kharkhana thang dewiong (Coke factories) bad kiwei ki kharkhana dew bilat bad kiwei-kiwei, kan long kumno ynda pynpoi sa ia kita ki Rel.

Ym dei eh tang iaka jinglko ka mariang, kaba ma ka dei ka jinglko ki briew. Ya sdang shuwa daka leit kai shongrel ban pynbieit. Tang shipor yn jah sa ki khun samla bad yn leit wad shano kein ia ki? Tang kane shuwa kaba barit eh, khlem pat kren ia kiwei ki bynta ki ban ktah iaka shong ka sah.
Ban weng tang ia kiba sah ha ki jaka Sorkar, ha Iew Mawlong ruh katne ka jwat, nalor ba la pybiang ia ki shawei pat da ka Sorkar hi? Kine lei kiwei-kiwei ynda ki wan?