Shillong,16 Nailar:
Mynta ka sngi ki tylli ki sengbhalang bhalang, ki la shim ia ka rai ban pyn long ia ka jingiakhih kaba radbah lada ka jingiakren jong ki bad u Mukul ha ka 29 tarik kam long khaw.
Toi ha ka jingshisha kitei ki sengbhalang, ki la thmu ban pynlong ia ka proseshon kaba heh bha mynta ka sngi, hadien ba la wai ka jingialang, hynrei na ka daw ba la khot ia kren ia ki da u Myntri Rangbah ki la hap ban pynsangeh shuwa ia katei ka jingiaiaid paidbah.
Na ka jingialang jong ki seng kaba la mih mynta ka sngi, la sngewthuh ba ha ka 29 tarik, ki nongialam sengbhalang kin leit ia kynduh ia u Mukul ryngkat ki jingiakren tang, na ka bynta ka ILP, ym da kiwei pat ki ain, ne ki mat ia kren mynder bad lada u Myntri Rangbah u pyrshang ban pynshad shrieh ia ki da kiwei pat ki jingiakren kin ym treh satia ban ia kren bad kin bteng beit ia ka jingiakhih.
“Lada ka sorkar kam lah ban ai rai ban pyntreikam ia ka ILP ha ka 29 tarik ngin pynlong ia ka jingiakhih kaba khlem sangeh haduh ba ngin lah ban pynkohnguh ia ka sorkar” ong ka sur na ki sengbhalang.
Katkum ka jingkren jong ki nongialam sengbhalang bapher bapher la sngewthuh ba ka 29 tarik ka dei ka rai ia ka sorkar ba kan ong em-ne-ho,oid ia ka ILP bad la sngewthuh ruh na katei ka jingialang ba lada ka sorkar ka ong em bad ka kyrngah lehse naduh ka 30 tatrik shajrong kan long ka jingiakhih kaba heh tam ha ka jylla, ha kaba ki sengbhalang kin ia khih khlem pud bad khlem jingsangeh haduh ban da lah ban pynkohnguh ia ka sorkar ba kan pyntreikam ia ka ILP.
Phi don ban ong eiei?