Shillong 21 K’Lyngkot: Ubah Phrangstarwell Wankhar uba dei ruh u nongialam Ka Sur Paidbah jong ki ar Dorbar Shnong ka Mawkynrew bad Mawlein, ula ong, baroh ki ar shnong kila ieng skhem haka nongrim ba kim shah satia ban phah shna ia ka jingpyntrei iaka skul Ramakrishna Mission ha Mawkynrew.
Ula ong, ba hynnin ka sngi ha kapor ba ki leit tur sha katei ka jaka trei ia katei ka skul, ki leit da ka jingjai jai bad ym shem don kano kano ka jingthmu ban pynkulmar ne pynpra noh ia katei ka jingtrei, hynrei ban pynkhuid khnang ban pynpaw, ba kilong trai shisha.
Kane ka jingjia iakynad hynnin ka sngi kadei ka ba la jia hadien ba ki paidbah ki la leit ban tur beit naphang ban leit sha ka Madan Umjar (ka jaka ba shna ia katei ka Ramakrishna Mission) ha ka ba kila kynnoh, ba u Acting Sordar lem bad ki briew jong u, kila aiti sop sop iaka jaka kaba dei ha Madan Football Umjar sha ki bor pyniaid jong ka Ramakrishna Mission ban tei ïingskul.
Ubah Phrangstarwell Wankhar u la ong, ba ki paidbah jong ki ar shnong kata ka shnong Mawkynrew bad ka shnong Mawlein kim shem la pyrshah ban tei skul hynrei ki pyrshah pat ban tei ha Madan Umjar namar kane ka dei ka jaka jong ka Mawkynrew Sports Club.
U Acting Sordar ba mynta u la iaid lait iaki paidbah bad iaki bor shnong jong ka Mawkynrew bad Mawlein daka ba ai jaka sop sop iaka Ramakrishna Mission ban tei iingskul ha ka jaka jong ka Mawkynrew Sports Club ka ba la ktah ia ka Madan Umjar.
Haba kylli pat, la ka shnong ka pyrshah ia ka jingshna skul, hynrei ubah Phrangstarwell Wankhar ula jubab da ka ba ong, ba ngi donkam ia baroh ar tylli kata ka skul naka bynta ka jingmyntoi ka thaiñ bad haka juh ka por ngi donkam ruh ka jaka ialehkai (Madan Football) bad ka jingpyrshah ki paidbah ban tei iaka skul Ramakrishna Mission kadei namar ba ïa kane ka skul, la tei haka jaka ba la ai shaka Mawkynrew Sports Club, nalor kata ula ong ruh, ba lada shna shawei ka bym ktah ia ka shnong kim lei lei hynrei ban wan shna jubor khlwm da tip ha ka jaka bym dei ban shna ngin hap ban pyrshah.
Shuh shuh ula bynrap, ba ki don ki sakhi sabut ban pynshisha, ba ka jaka ba u Acting Sordar ha mynta u ai sha ka Ramakrishna Mission ban tei ia ka skul kam shem dei ha Madan Umjar, katba ia katei ka Skul pat la tei marjan bad ka Madan kaba la pynlong ruh iaka jingkyntur pud haba tei iaka skul.
Haba iadei bad ka jingiakynad bad mih jingkulmar hynnin ka sngi ubah Phrangstarwell Wankhar ula kynnoh, ba ki jingkulmar hi baroh ki mih namar ka jingleh donbor u Acting Sordar ba mynta.
Ula buh jingkylli ruh, ba mano ba aibor ia ki bor pulit ban kawang bom pynsat khmat sha ki paidbah bad ruh ban bom lathi naphang namar ha katei ka sngi ki paidbah ki leit da ka ba jai-jai ym ban pynkulmar bad ka jingsdang la jingkulmar dei na ki bor jong ka ain ki ba ka ap lypa ia ki.
Phi don ban ong eiei?