Ieng rynsan ka Kong Fenela ban ialap ia u Bah Paul Paw ka jingiapait ha ka HSPDP

Shillong, 07 Iaiong:
Mynta ka sngi ka nongialam ka HSPDP ka Kong Kong Fenela L Nonglait, ka la ieng rynsan ban ialap elekshon ia u kyrtong ka UDP u Bah Paul Lyngdoh ha Mot phran. Ka jingmih madan ka Kong Nonglait ka la pynpaw ba ka don eiei ha lyndet ba ka jingiaphiah ha ka HSPDP kaba rai ban kyrshan ia u kyrtong shimet u Pastor PBM Basiawmoit.
Haba kren ha Motphran ban pan jingkyrshan na ki paidbah ia u kyrtong ka UDP, ka Kong Nonglait ka la ong, “Ha ka elekshon MLA nga iakhun na ka HSPDP nga la shah rem 4 spah tam ha u kyrtong ka UDP u Bah H Brolding Nongsiej..nga iam shisha”.
Ka la ong biang, “Hynrei ka elekshon MLA bad ka MP ka iapher ka dei da kawei ka lynti”, ka la ong.
Kane ka nongialam ka HSPDP ka la ong ba ha kane ka kynti ka jaitbynriew ka donkam ban phah ia u Bah Paul sha ka iing dorbar thawain ka ri sha Delhi ban pynkhyllem ia ki dkhar boh.
Kane ka jingmih ka Kong Nonglait ban kyrshan ia u Bah Paul ka la pynlong ia ka UDP ba kan kmen. Katkum ka jingtip, ha kane ka elekshon, u president ka HSPDP u Bah Hoping Stone Lyngdoh um pat ju leit kren rynsan ban ialap elekshon ia u Pastor PBM Basiawmoit.
Ka Kong Nonglait ka la iakhun MDC ruh na HSPDP na Mawthadraishan hynrei ka la shah rem biang ha u kyrtong ka UDP.
Haba ialap ia u Bah Paul, ka la ong ba u dei u MP lada un shah jied ban leit tied jingkhang sha Delhi na ka bynta ki jingdonkam jong ka jaitbynriew ban dawa ia ki jingiada na ki bor ba thmu ban pynjot.