Ieng ki 3 seng ban pyrshah tih Uranium

Shillong, 17 Rymphang:
Ki lai tylli ki seng riewlum ba kynthup ia ka KHNAM, HSPDP bad ka UDP ki ieng rangbah ha ka mat treikam ilekshon jong ki ban pyrshah jur ia ka jingtih ia u mar pohkhyndew Uranium. “Ngin pyrshah jur ia ka jingthmu ban tih ia u uranium” ong u President ka KHNAM u bah Pyndapbor Saibon bad ha ka juh ka por u Nongaiktien ka HSPDP u bah G Nonglong u la ong ba ka HSPDP kan ieng ban pyrshah beit ia ka jingtih ia utei u marpoh khyndew. Katba na ka liang ka UDP lyngba u Secretary jong ka u A.F Dkhar u la ong ba ka seng kam shym la buh ha ka mat treikam jong ka ban pyrshah tih uranium hynrei u la ong ba katei ka mat ka hap hapoh ka mat treikam ba ka UDP ka la dawa ba dei ban pyntreikhlain ia ki ain kiba la don lypa.