ïeng ka khyrdop khajna ka KHADC ha Upper Shillong

Shillong, 29 Iaiong:
Ka la pynkyndit ia kiba bun bah ki nong ñiah trok rit trok heh mynta ka sngi naba la bat ia ki kali jong ki ha ka surok bah ha Bañiun, Upper Shillong bad la khrong khajna ruh na manla kawei pa kawei ka kali kaba kit mar la ka long kaba hiar sha ki thaiñ Sohra, Pynursla ne kiba kiew na kitei ki thaiñ sha Shillong. Hadien ba la ioh jingtip ia katei ka jingshah bat kali ha Upper Shillong u nongthohkhubor u la leit ban jurip ha katei ka jaka bad la lap ba ka la long shisha kumta.
Ha ka por ba u nong thohkhubor u la leit sha katei ka jaka la lap ba bun na ki nongniah trok ki ang lyngngoh haba la bthah ia ki ba ki dei ban siew khajna, ka trok rit kaba kit maw kit shyiap,kit synsar, bad kiwei pat ki mar kiba wan na ki thaiñ Ri-War la khrong T.50 tyngka,kum juh ruh ia ki trok rit kiba kit phan,kit khaw kiba hiar na Shillong sha ki thaiñ ba sharum la khrong T.50 tyngka katba ki trok heh pat la khrong T.100 tyngka.
Haba kylli na ki briew kiba lum pisa na ki trok la ioh jingtip ba katei ka dei ka khyrdop khrong khajna jong ka Khasi Hills Autonomous District Council (KHADC) kaba la sdang ban khrong naduh mynta ka sngi. Uwei u rangbah uba ap ha katei ka khyrdop u la iathuh ha katei ka khyrdop yn Check ia ki Challan ki trok kit mar. Utei u rangbah u la pyni ia ki kot ki sla ba ka District Council ka la ai bor ban pynieng ia katei ka khyrdop bad la iohi ba ha kitei ki kot ki sla la pyniaid ia katei ka khyrdop da u wei u briew uba la tip kyrteng kum u Sdangyoo L Dkhar ba shong basah ha Upper Nongrim Hills, Shillong.U la pyni ruh bun ki kot ki sla kiba la ioh hukum ban pynieng ia katei ka khyrdop.
Hadien ba la ioh jingtip na ki nongniah kali ia katei ka jingjia kham hadien katto katne por la poi sa ki sengbhalang seng trei monsngewbha ha katei ka jaka ban wad jingtip bniah shaphang katei ka khyrdop ha kaba la don ruh ki nongialam jong ka HYC,Upper Shillong kiba la leit jngoh ha katei ka jaka.
Ha ka jingiakren bad u nongthohkhubor kiba bun ki nongniah trok rit ki la kren diaw mynsiem namarba ka kamai ba ki ioh kamai ka long kaba rit hynrei ki hap pat ban siew T.50 tyngka haba iaid lynti lyngba ka Upper Shillong. Ki la ong ba kiba bun na ki trok rit ne ki kali pick up ha ka thain Upper Shillong ki dei kiba kamai tang na shnong ha shnong kumna Mylliem sha 7 mer,5 mer, Sadew bad kumta ter ter bad ka bai kali ruh ki shim ha ka dor kaba tad hynrei ki dang hap pat ban siew ia kate ka khajna ha ka dor T.50 tyngka. Ki tyllong khubor ba u Rupang u la ioh jingtip la ong ruh ba lashai ka sngi kan don ka jingialum jong ki nongniah trok ha madan Umdiengpun jan Elephant Falls ban ia kren halor katei ka phang.