Ieid mariang man ka sngi, ong u MLA

Shillong, 8 Jylliew:
U MLA ka Sohra u Bah TW Chyne u la kyntu ia ki paidbah ba kin ieid ia ka mariang man ka sngi, ym ban shu rakhe tang shi sien shi snem.
Haba kren ha ka jingrakhe ia ka sngi iada ia ka mariang kaba la pynlong da ka Khadar shnong-Laitkroh Block u Bah Chyne u la ong ba ki paidbah ki dei ban ieid ban iada ban nym pynjor pathaw ia ka mariang namar ba ka mariang ka dei ka jingim ia u khun bynriew.
Shwa ban thung dieng, u Bah Chyne u la ong ba ki khynnah skul ki dei ban long ki nonghikai ia kiwei pat. U la ong ba ka jingrakhe ia ka sngi iada mariang kam mut tang ban shut hung dieng hynrei ka long ban nym pynjaboh ia ka mariang, ban kiar na kaba bret pathar ia ki plastik namar ba ki long kum ka nongshun ia ka mariang.
“Lada phi ieid phi sumar ia ka mariang, ka mariang ruh kan sumar ia phi”, la ong u MLA ka Sohra.
Ha kane ka sngi la ioh ruh ia ka jingkren na ka BDO ka Block ka Kong EL Warjri nalor kwei pat.
Kham hadien la pynlong ia ka jingthung dieng ha phyllaw ka Block kane ka sngi kaba la wan iashim bynta ki khynnah skul ka Tirot Sing Memorial Secondary School bad ki nongtrei ka Block.  Ka don ruh ka jingiakop dor dur ha kane ka sngi kaba iadei shaphang ka mariang ha ka St Peter Skul.