Iehnoh u bah George ia ka kam VP ka TMC

Shillong: U Vice president ka Meghalaya Pradesh Trinamool Congress (TMC), u Bah George B Lyngdoh ha ka 1 tarik Nohprah ula phah ia ka shithi iehnoh kam kum u nongialam ka seng TMC Meghalaya namar ki daw shimet.

Katkum ka shithi ba la thoh sha u president ka MPTC, u Bah Charles Pyngrope ula pynpaw ba u Bah George um kwah shuh ban long nongïalam, hynrei un dang dei hi u dkhot ka TMC Meghalaya, bad u kwah ban pynlait noh ia ka kam ba u bat kum u vice president ka TMC Meghalaya bad kum u president ka TMC Umroi Block.

U Bah George u dei u MLA barim na Umroi uba la jop na ka seng Congress ha u snem 2018, hynrei ha u Naiwieng jong u snem 2021 ula mih noh na ka seng Congress ryngkat bad ki 12 ngut ki MLA hapoh ka jingialam u Dr Mukul Sangma, bad leit ban rung sha ka Trinamool Congress. Ha ka election MLA mynta u snem 2023 u la shah rem noh ha u kyrtong jong ka NPP.