Iehnoh 33 ngut ki KSU Umjaiur bad ar ngut na Mawlai Circle

Shillong, 7 Naitung:
Ki dak ki shin ka jingorpait ka KSU ki la nangjur ha kaba 33 ngut ki dkhot shitrhem jong ka KSU Umjaiur Unit bad ar ngut ki nongialam jong ka Mawlai Circle ki la rai ban iehnoh ia ka seng naduh hynne ka sngi Nyngkong.
Ha ka jingpyllait khu bor hynne ka sngi kitei ki dkhot jong ka KSU Umjaiur ki la ong ba ka daw ba la pynlong ia ki ban iehnoh ia ka seng ka long halor ka nongrim ba ka jinglong shah shilliang ki nongialam ka seng kmie ban kdup ia u soh pyut bad ban bret ia u soh bha.
Ki la ong ba ia u Pre sident barim jong ka KSU Mawlai Circle u Bah Don boklang Kharlyngdoh uba la shakri 16 snem ha ka seng la beh seng tang hapoh 6 kynta.
“Aiu kan jia ia kiba shakri malu mala tang kumba 5 snem eiei”, la ong kitei ki dkhot KSU Umjaiur.
Ki la ong balei ki beh seng tang ia uwei namar bdon bun kiba la mih jyndat na ka jingialang ka General Executive Council (GEC) bad kane ka jingleh kam long kaba shongnia namar ba ki don bun kiba mih jyndat hynrei khlem beh seng ia ki.
Shuh shuh ki la ong ba ka jing wanrah ia ka jinghiapher thain hapoh ka seng ka long ka jingmynsaw ia ka jaid bynriew rit paid Khasi.
Ki la ong ruh ba ka jingkren bein ia ka shnong Mawlai ba haduh katno ki sngew khlain bad ka jingiaid lait ia ka sur jong u paidbah ba la long ha madan student ban dawa ia ka ILP kam dei kaba shongnia, hynrei la pdiang pynban da ka modified ILP. “Kane ka dei ka mat ba kongsan ba ngi duh jingshaniah ia ki nongialam ka seng kmie namar ba ki iapein ia ka ILP sha ka M-ILP (Mukul-ILP)”, ki la ong.
Kine ki dkhot jong ka KSU Mawlai Umjaiur ki la rai ruh ba ia ka U-16 u Tirot Sing Syiem Memorial Football Tournament 2014 ba ju pyniaid da ka KSU Umjaiur Unit la 7 snem, la pynkylla noh ia ka kyrteng jong ki nongpyniaid sha ka Mawlai Umjaiur Tirot Sing Memorial Football Committee kaba ki nongpyniaid kin dei ki KSU ba la iehnoh.
Ha kawei ka liang ar ngut ki nongialam ka KSU Mawlai Circle kynthup u Bah Allan Star Marwein uba dei u Environment & Cultural Secretary u la iehnoh ia ka seng namar ka jingbym hun ia ka M-ILP (Mukul-ILP) bad ka jingbeh seng khlem nongrim ia u President ka KSU Mawlai bad ka jingpyndam jubor ia ka KSU Mawlai baroh kawei.
Katba u Bah Kitboklang Khongwar uba dei u Discipline Secretary ka Mawlai Circle u la rai ban ieh noh ia ka KSU namar ka jingduh jingshaniah ia ki nongialam ha kaba iadei bad ka jingiakhih dawa ILP bad ruh ka jingbeh seng ia u samla Donboklang Kharlyngdoh.