Ieh khunswet ka sorkar Meghalaya ia ka thain Umtyrnga

Umtyrnga, 8 Naiwieng:
Ka sorkar Megha laya haduh kine ki sngi ka dang ieh khunswet ia ki jaka ha khappud bad ka jylla Assam bad kane ka jingleh ka la pynlong ia ki briew kiba im ha khappud ba kin shim ia ki jing myntoi na ki ar tylli ki sorkar.
Ki jaka kiba ka sorkar jylla, ka la ieh khunswet palat ka dei ka thain Umtyrnga ter ter sha ki thain Nongspung A  bad Nongspung B. Kine ki shnong ki dang sah dien ha ki liang baroh, katba ka sorkar Assam ha Pilingkatta, ka la pynbiang ia ki jingdon kam jong ki paidbah.
Ha kane ka thain Umtyrnga kaba don ha Ri Bhoi District  ki don bun ki shnong ba ki paidbah ki kwah ban sah hapoh ka jylla Meghalaya, wat la ki hap ban shah ia bun ki jingeh kaba ki ia kynduh kumha ka liang ka lynti ka syngkien, ki surok bad kine  ki paidbah kiba shong ha kane ka thain ki shen jingeh shibun.
Haba u SP News Agency u la ioh ban ia kynduh bad ki briew katei ka thain ki iathuh ba ki ia kynduh shibun ki jingeh ha ka liang ka koit ka khiah bad haba ki pang ki shitom ki leit sha Sharhali Beltola ban shim dawai, namar kane ka jngai tang kumba lai ne saw kilometer na kane ka thain, la ong ban ia kren ia ki jingeh jong ki paidbah ka long kaba ym lah ban batai shuh.
Ki briew kiba im ha kane ka thain ki bun ki nongrep kiba rep tympew bad kiba rep kwai bad ka iew kaba ki juh ialeit ia wan ka dei tang ha Umtyrngar la iathuh ba ki shnong hakane ka thain ki don kumba khat hynriew tylli bad ki hap hapoh jong ka hima Mylliem jong ka raid Marwet. Bun na kiba u SP News Agency u iakren kim kwah ban iathuh ne pynmaw ia ka kyrteng jong ki.SP News)