Iathain ka siew khajna Municipal

Shillong, 24 Naiwieng:
Ka Shillong Municipal Board (SMB) hynne ka sngi ka la lum ia ka jingialang bad ki rangbah shnong jong ka thain Laitumkhrah, Jaiaw bad Lachumier ban iakren ia ka jingpynkiew ban siew khajna sha ka Board ha Soso Tham Auditorium.
Ha kane ka jing ialang la iathain bha namar ka la mih ka jingiapyni nia khamtam na ki rangbah shnong halor kane ka jingthmu ka Municipal.Haba kren hadien ka jingialang, u Bah SB Nongdhar u Rangbah Shnong bad u Chairman ka Laitumkhrah Dorbar Shnong Pyllun u la ong ba baroh ki jingai jingmut ba la ai ha ka jingialang ban phah siew khajna ia ki paidbah yn sam sha baroh ki dorbar shnong khnang ba kin pyrkhat ia kane ka jingleh ka Municipal.“U CEO u la pynthikna ban ai jingtip shwa sha baroh ki dorbar shnong khnang ba kin ai ia ka jingsngew jong ki”, la ong u Bah Nongdhar bad bynrap ba ha kane ka jingialang la mihkhmat da ki dkhot ka executive committee jong ka Dorbar bad bun na ki, ki la pynpaw ba kim tip ia kane ka kam watla la sam jingtip sha ki bad don katto katne ki bym tip.U la kynnoh ba ka SMB ka la phiel ban ai ia ka jingshakri kaba biang sha ki briew kum ka jingpynbiang um dih, ding surok, lum jaboh, peit ia ki ksiew bad kiwei ki jingdonkam paidbah.U Bah Nongdhar u la ong “lada ka kam ka biang ka jingshakri ia u paidbah, ka jingpynkiew khajna kan long kaba shong nongrim hynrei haba ka kam ym biang kumno yn pdiang ia ka jingpynkiew tang ia ka khajna”.“Ngi pyrshah jur ia ka jingthmu ban pynkiew khajna da ka Shillong Municipal Board (SMB) na ki iing khlam ka kam kaba biang” la ong u Bah Nongdhar bad bynrap ki paidbah kim dei ban long langknia na kane ka jingbym ler ka Municipal.“Ka Dorbar ka sngew ba ka  SMB ka dei ban pynbiang shwa ia ka kam shakri jongka bad sa pyrkhat ia kane ka ka khajna” u la ong bad bynrap, dei ban ialum iasyllok bad ki nongsiew khajna ban pynbha ia ka rukom treikam ha jaka ban phah siew khajna.
U la ong ba katkum ka CEO ka SMB ka hap ban pynkiew ia ka khajna namar ba kam lah shuh ban im ha ka dor kaba rim mynta namar ka jingbun ki jingdonkam.U la ong ba ia ka jingialang kaba bud, ym pat buh sngi halor kane ka bynta.