Shillong: U Pynjam Talang na ka shnong Mupliang, Nartiang, u Daniel Swer na Lummawbah Mylliem, i Joycy Mary Songthiang na Mawblang Mawkynrew bad i Narisuk Kharwar na Madan Mawser Mawphlang Constituency ki dei ki briew kiba don ka jingduna ha ki dkhot met, ki bymlah ban iaid, ki la wan thep vote mynta ka sngi 11-04-2019, ha kaba ka tnat Election ka la pynbiang ki kali na ka bynta jong ki bad ynda poi ha jaka thep vote (Polling Station) ia u Pynjam Talang ki la shu rah, ia u Daniel Swer ki la pynshong da ka Wheel Chair, i Joycy Mary Songthiang i la iaid hi suki ban kyrshan da ki dieng bad i Narisuk Kharwar i ba shu iaid da par kumba ki kwah.
Katkum ka jingtip na ka tnat Election ki briew kiba don ka jingduna ha ki dkhot met ki don 4686 ngut kiba la dep pynrung kyrteng ban ioh thep votes ha ka jylla Meghalaya. Ki shynrang 2540 bad ki kynthei 2146.
Kumta ka seng Khasi Disabilities Association (KDA) ka la dep kyntu lut ia baroh, ki ba kidei ban iashim bynta khlem pep ha kane ka Election sha ka ïing Dorbar Lok Sabha-2019, namar ka vote jong ngi ka long kaba kordor na ka bynta ban rai ia ka lawei jong ka Ri.
Ka tnat Election Department ka leh bha shibun eh ia ki briew kiba don ka jingduna ha ki dkhot met kiba leit thep vote, da kaba leit shaw leit buh da ka kali ia ki bymlah iaid bad ka pynbiang Wheel Chair ia kiba donkam. Kumta kane ka jingleh ka tnat Election ka pynshlur, ka ai mynsiem ia ki briew kiba don ka jingduna ha ki dkhot met ban ia shim bynta ha kaba jied ia ki nongthaw aiñ jong ka Ri. Kane ka long ka kyrwoh na u president ka Khasi Disabilities Association (KDA) u bah Starwin Kharjana.
Phi don ban ong eiei?