Shillong: Ka lumpungbah kaba 32 jong ka Seng Khihlang kaba kynthup ka Seng Khasi bad Sein Raij, ka la kut ha kane ka sngi Robibar ha Mawngap, East Khasi Hills, ha kaba la sakhi ia ka jingwan iashim bynta ki nongialam na ki kynhun niam tynrai na ki jaitbynriew na kane ka Dong Mihngi ka India, kila wan ban iadon bynta bad ban iasam lang ia ki kyntien symboh.
Kiba wan ban iadon bynta ki kynthup na jylla Arunachal Pradesh, Nagaland, Manipur, Tripura, Karbi Anglong ruh kumjuh. La ioh ia ka jingkren na u Thumbui Zaliang u General Secretary ka Haroka association Nagaland, u Bai Taba u General Secretary ka IFCSAP na Arunachal Pradesh, u Balaram Pangcho u Adviser ka Okhiman Sansha Karbi Anglong, bad ka Dr Lamalu Thaimei na Imphal university, Manipur.
Kine baroh ki la pynpaw bad ai mynsiem ia ka Seng Khihlang ban trei ban iada bad ban kyntiew ban pynneh pynsah ia ki riti dustur bad ka jingngeit niam tynrai katkum ba la ai pateng ki longshwa man shwa.
Ha kane ka sngi, la ioh ruh ia ka jingshad ka jingrwai ba la ai da ki kynhun na ki tnad seng bapher bapher na kyllleng ki jaka.
Da ki phew hajar ngut ki paidbah na kylleng ka ri Khasi ki la wan ban iashim bad sakhi ia kane ka lympung kaba la neh lai sngi kynthih bad kaba ju long man ka snem.
Ka lympung ka long ban pynneh ban pynsah bad ban iada ia ka jingshah tyllep na kiwei ki jingngeit hynrei ban skhem ha la ka niam tynrai.
Phi don ban ong eiei?