Iaroh u myntri ia u MLA Jirang, ban pynioh kam pynroi hapoh ka Konstitwensi

Nongpoh:Haba kren sha ki paidbah ha shnong Pilliangkata, u Bah Lahkmen Rymbui, u la ong ba ka sorkar jylla ka don ia ka thong ban nangtheh shibun ki kam pynroi ha katei ka thain bad ia ka Jirang Constituency hi baroh kawei.

Ban pynshisha halor ki kam pynroi, kiba ka sorkar jylla ka la pynpoi ha Jirang Constituency, u Bah Lahkmen Rymbui, u la ong ba kumba ka long mynta, ka Jirang ka la ioh khambun ki skim pynroi kiba heh bad kiba long ka jingmyntoi ia ki paidbah, kata naduh ka surok heh na Baridua sha Umsen, ka surok na Umdu sha Umrit, ka surok ka Mairang-Patharkhmah sha Rani, ar-tylli ki skul Eklavya Model Residential School, ka Model Degree College ha Patharkhmah lem bad kiwei.

Haba iadei bad katei ka jingioh skim pynroi ka Jirang Constituency, u Bah Lahkmen Rymbui, u la ai ruh ka jingiaroh ia u Bah Sosthenes Sohtun, MLA ka thain, namar dei lyngba ka jingtrei shitom ka jong u, kaba la pynlong ia katei ka Constituency ba kan ioh ia kitei ki kam pynroi na ka sorkar.