Ha ka sngi balang ba ladep, ka Synod Higher Secondary School, Shil long ka la rakhe ia ka jingiaid lynti jongka ha ki san phew snem ba la dep ha ka rukom kaba ishong kun bad shongshit bha ba la pynkhraw da ka jingia don lang u Myntri Rang bah ka jylla u Mukul Sangma, ka myntri kam pohiing ka jylla Kong Roshan Warjri, nalor kiwei kynthup ki Pastor, ka Principal ka skul Kong DR Shullai, bad ki khyn nah skul bad ki Rangbah Shnong nalor ki nonghikai bad ki kmie ki kpa.
Hadien ka jingiaid kaba 50 snem ne ka Gol den Jubilee kane ka skul hynne ka la lah ban plie sa ia ka Commerce Stream ha ka klas XI bad XII. Kane ka skul ka dei kaba ai jinghikai tang ia ki kynthei bad ka dei kawei kaba paw bha ha kane ka nongbah bad ha kine ki snem ba la dep, ka la pynmih bun ki sohthiang ha ka result matrik.
Haba kren ha kane ka sngi, u Myntri Rangbah ka jylla u Mukul Sangma u la ong ba ka jinglah jong ka Synod Skul ban tyllun ha kine ki san phew snem, kam dei shuh kaba kai hynrei ka dei ka lynti iaid kaba jlan ban poi sha kane ka skul kaba nangkiew na ki sngi sha ki sngi.
“Ka jingpule kam dei shuh ha kane ka juk ban shu ap tang ia ki kam sorkar hynrei ka dei ban btin lynti ban ieng ha la ki jong ki kjat”, la ong u Mukul.
U la ong ruh ba teng teng ki jingkhmih lynti kim ju urlong hynrei kam dei pat ban long ka jingduh jingkyrmen ha ka jingiakhun. Hynrei hadien ba la pule dei ban pynshong nongrim ba ki dei ban pynkhreh ialade ban iaid ha ka jingim ban trei ia ki kam ki jam, ym tang ban shu peit kliaw ia ki kam sorkar.
Hynrei ha ka juh ka por, u Myntri Rangbah u la ong ba nalor ka jinghikai ba la ioh na skul, ki khynnah skul ki dei ban ioh ruh ia ka jingbtin lynti ban jied ia ka jingpule ba ki biang katkum ka jingtbit jongki. “ki kmie ki kpa ki dei ban ialam lynti ia ki khun ban jied ia kano ka lain jingpule”, u la ong.
U iathuh ruh ba ka sorkar ka la pynmih ia ka skhim ha kaba ki skul ne ki sengbhalang kiba don ka mynsiem ki lah ban shim kabu ban hikai (counseling) ia ki khynnah khamtam ha ka sobjek saian na ka bynta kito kiba pule ha ka klas IX bad X.
Shwa ia kane, ka Kong Roshan ka la ong ba ka Synod skul ka la nangkiew naduh ba sdang ia ka ha ki san phew snem ba la dep. Ka jinglah ban plie sa ia ka Commerce Stream, ka dei sa uwei u mawjam ha ka jingshakri jongka ha ka pule puthi.
“Nga ngeit skhem ba kane ka skul kan nang tyllun shuh shuh ha ki sngi ban wan”, la ong ka Kong Roshan.
Na ka liang ka principal ka skul, ka Kong Shullai ka la pynpaw ka jingsngewnguh ia u Myntri Rangbah uba la pynlait por ban iadon kti lang ha kane ka sngi ban rakhe ia ka jingdap 50 snem kane ka skul.
La pynshongshit ia kane ka sngi da ki jingrwai ki jingshad bad ki jingialehkai bapher bapher.
Phi don ban ong eiei?