Iaroh u Modi ia ki pyrjong ba dait ia u Rahul

Sagar ,18 Naiwieng:
Ka thma ktien hapdeng ka BJP bad ka seng congress kam pat shym la kut ha kine ki sngi, ha kaba u Myntri Rangbah ka Gujarat u Narendra Modi ha ka jingkren paidbah jong u ha ka jingialap elekshon u la ai ka jingiaroh ia u ‘kain pyrjong jong ka Bundelkhand uba la nud ban dait ne kynthah ia u Vice President ka Congress u Rahul Gandhi.
”Nga kwah ban ai ka jingiaroh ia u ‘kain pyrjong uba la nud ban kynthah ia u shahzade (Rahul),namar ym don uwei ruh na ka ing ka sem jong u kaba la shah kynthah ha ki spah snem ba la dep” ong u Modi. U Modi u la ong ba ym don uwei ruh uba nud ban kren pyrshah eiei ia ka kur Gandhi namar tang shu ang bakla kin ym aili iano iano ruh.
U Rahul ha ka jingialap elekshon jong u ha u bnai ba la dep u la ong ba u la shah kynthah pyrjong ha ka por ba u leit ban jngoh ia ka Bundelkhand ha u snem 2009. U Modi u la ong ba u kwah ban iakhun elekshon na ka bynta ka mat ban wanrah ia ka roi ka par ia u paidbah, hynrei ka Congress ka lehrain ban kren ia kata bad ka don tang ka thong ban pynkiew ia ka vote bank. Ki briew ka Congress kim don jingmut bad jingkitkhlieh eiei hynrei ki dang iai bteng hi ia ka kam bamsap jong ki kawei na kawei pat.Kham mynshuwa u Modi u la ong ba u myntri Rangbah ka Madhya Pradesh u ShivRaj singh Chouhan u la leit jngoh ia manla kawei pa kawei ka shnong hapoh ka jylla jong u bad u la ai ka jingkhein ia kaei ka sorkar jong u ka la leh.