Nongpoh:Ka la long shisha ka jingkmen kaba khraw eh ia ki nongpyniaid lem bad ia ki khynnah ka skul ka St. Jude Secondary School lem bad ia ka shnong 12mer kaba don ha khappud ka Meghalaya-Assam ha Ri Bhoi, namar kawei ka bynta kaba shait sahkut ki jakhlia, ki jaboh jabain bad kaba la wanrah ia ka jingshlei um hapoh katei ka shnong, hynrei mynta pat la lah ban pynkhuid lut ia kitei ki baroh, kata lyngba ka jingiarap kaba kyrpang eh da u Bah Sosthenes Sohtun, MLA ka NPP na Jirang.
Lah ruh ban kdew hangne, ba katei ka shnong bad khamtam eh ia ka skul St. Jude Secondary School, ha kaba manla u snem ki la mad ia ka jingshlei um, kaba la wahrah ia ka jingduhnoh ia katei ka skul lem bad ia ka shnong hi baroh kawei, hynrei mynta u snem lehse katei ka shnong kan lait na ka jingshlei um, namar ba la pynkhuid lut ia baroh ki nala ba sahkut jakhlia ha katei ka shnong.
Haba iadei bad katei ka jinglah u MLA ban iarap ban pynkhuid ia katei ka jaka, ki nongpyniaid ka St. Jude Secondary School bad ruh na ka shnong 12mer Umpher, ki la ai ka jingiaroh kaba khraw eh ia u MLA, namar u la lah ban iarap ia ka jingdonkam kaba hakhmat eh hapoh katei ka shnong.
Hadien ba u la iarap ia katei ka shnong, u Bah Sosthenes Sohtun, haba kren sha ki nongthohkhubor, u la ong ba u la phah jingthoh ruh sha ka Deputy Commissioner ka Ri Bhoi lem bad sha ki heh ka NHAI ba ki dei ban phah jingthoh sha ka sorkar Assam, na ka bynta ban pynkhuid ia ki bynta sha ka jylla Assam, khnang ba katei ka shnong kan lait na ka jingshlei um kumba ka la mad ha ki snem kiba la leitnoh baroh.
Phi don ban ong eiei?