Iarap Computer ka FKJGP ia ka skul ha Umpowin

Nongpoh:Ki nongialam ka FKJGP Sengkmie bad Ri Bhoi, ki la leit ban iarap da ki Kor Computer sha ka Mangkathiang Makdoh Secondary School, kaba don ha shnong Umpowin, Ri Bhoi.

Ki nongialam ka FKJGP kiba la donlang ha katei ka sngi, ki kynthup u Bah Eldie Newton Lyngdoh, Vice President ka Central Body, u Bah Elton C. Wajri Assistant Secretary ka sengkmie, u Bah Lui Star Lyngdoh, President ka FKJGP North Khasi Hills District Unit lem bad kiwei ki dkhot ka seng. Ha katei ka sngi kitei ki FKJGP ki la leit ban ai ti ia kitei ki kor Computer sha u Vice Principal katei ka skul.

Haba iadei bad katei ka jingleit ban nohsynniang sha katei ka skul, u Bah Eldie Newton Lyngdoh bad u Bah Lui Star Lyngdoh, ki la ong ba ka jingthmu ka seng ban ai jingiarap da ki kor Computer, ka long shi bynta ban kyntiew ia ka pule ka puthi ki heprit ba kin dup ioh lad ban tip katkum ka juk computer ne ka juk saian ba mynta, khamtam eh ba katei ka skul ka dei kawei na ki skul kaba don ha ki thain khappud bad ka Assam.