U MLA ka West Shillong Bah Paul Lyng doh bad ka nongialam sengbhalang ka Kong Angela Rangad ki la iapher jingmut halor kumno ban jied ia ki MLA sha ka iing dorbar thawain.
Haba iashim bynta ha ka jingiasyllok halor ka phang ka imlang sahlang, ka sain hima sima bad ka ioh ka kot kaba la pynlong da ka St Anthony College hynne ka sngi, u Bah Paul uba wan ban long kren kum u panelist, u la ong ka jinghiar ka synshar khaddar ha kane ka jylla, dei namar ka jingjied ia ki nongmihkhamt ba duna kyrdan pule.
“Tang ban ioh ia ka kam peon donkam ban pas ia ka klas ba phra hynrei ha ka kam jied nongmihkhmat, u bym don kyrdan ruh u lah ban iakhun bad ban shah jied, kane ka long ka kam kaba ktah ia ka synshar ka khaddar”, la ong u Bah Paul bad bynrap u MLA u dei ban long u briew uba la don kyrdan la kumno kumno ban pyndep ia ka jingpule ha ka Graduation.
U Bah Paul u la ong ba ka politik ha u, kam dei ka kam kaba dei ka profession namar ba u briew uba trei kano kano kam lada u biang ka account ha bank u lah ban wan iakhun khlem da bna ei ei ruh bad kane ka dei ka daw ka jinghiar ka jingsynshar ha kane ka jylla.
Ha ka constituency kaba la mih khmat da u Dr Baristar Pakem (bam kwai ha u duwai u Blei) mynta la mihkhmat da u nongkhaii dewiong”, la ong u Bah Pual bad bynrap haba jied ia ki nongmihkhmat ki bym don ka jingstad ha ka liang ka pule dangle, ka jylla ka shem jingeh ban kiew ha ka liang baroh.
Hynrei na ka liang ka Kong Angela ka la pyni nia da kaba ong ba ka kam synshar khadar kam da dei eh ban jied ia u briew uba stad ha ka jingpule, hynrei donkam ia u briew uba kitkhia bad uba trei bad sngewthuh ia ka jingeh jong ki paidbah.
“Ngi la jied bun ki briew kiba stad ha ka jingpule hynrei kim ler ei ei bad ki tbit pynban tang ha kam ban bamsap pynban”, la ong ka Kong Angela bad bynrap ba ka jingjied ia ki nongmihkhmat paidbah dei ban jied kiba don ka dor bad kiba sngewthuh ia ka jingeh jong ki paidbah ban synshar da ka rukom kaba khuid kaba kaba larkam shisha.
“Ka jingjied nongmihkhmat kam mut ba ngi shu leit tah sia na kti por elekshon hynrei ka dei ka jingiashim bynta ha baroh ha ka synshar ka khadar,kumno ka sorkar ka leh bad kaei ka jingtreikam na ka bynta ki paidbah”, laong ka Kong Angela.
Ka la ong ba ki party ha kane ka jylla kim nud ka rukom pyrkhat na ka ideology kaba neh bad ki shu kynmaw tang ha ka por elekshon.
Ka la ong ba man ki tnad sorkar mynta ha kane ka jylla, la kynrei ki kam bamsap suda bad ia kane la donkti ki briew kiba don ha ka bor katba ki paidbah ki la long tang ki nongshah banbein.
Na ka liang u Bah Paul u la kubur ba ki seng sain pyrthei ha kane ka jylla, ki kynmaw tang ha ka por elekshon bad ki paidbah ruh kim pyrkhat ba ka synshar ka khaddar ka kut tang ha kane ka elekshon bad ka long kaba bakla shishun.
U la ong ba 41 snem ka Meghalaya ka la iaid hynrei katba nang mih ki sngi, ka rukom jied nongmihkhmat ka la nang hiar ha ka jinglong. Khyndiar snem mynshwa, hadien ba la ioh ia ka jinglaitluid, ki paidbah ki jied hok ia ki briew kiba tbit khamtam kiba biang ha ka jingpule hynrei mynta sngewsih kam long kumta.
La don uwei u myntri sorkar haba u leit sah ha hotel ha New Delhi haba u khie step, u la khnoit ia ka bell ban khot ia u nongap bad hadien ba la wan u nongtrei ka hotel, u la kren phareng ia uta u nongtrei ha hotel, ‘ sngewbha ai tea bed ( step sha)’ ha jaka ban ong ‘bed tea (sha step)’, la ong u Bah Paul bad lada ngi ioh kum kine ki nongmihkhmat ki bym don ka bor sngewthuh ban iakren kaei kaban jia ia ka jylla bad ki paidbah.
Ha kane ka jingiasyllok, la ia shim bynta ruh u Bah Toki Blah u ohisar IAS ba la shong thait bad u president ka Shillong Press Club u Bah David O Laitphlang kiba la iakren jur ia ka jingdonkam ban wanrah ia ka jingsynshar ha ka rukom jied ia ki nongmihkhmat ha kane ka jylla. Hynrei la iakren ruh ba lada ki paidbah ki kwah ia ka jingkylla, dei ma ki kiban long ka jingkylla namar ba ha kaba kut, dei ki paidbah kiba jied ia ki MLA/MP/MDC ban iasaid ia ka khia ka shon bad ban thaw ia ka lad ka lynti ban kyntiew ia ka roi ka par ha ka jylla.
Phi don ban ong eiei?