Shillong, 3 Nailar:
Uwei u rangbah u la khlad noh katba 4 ngut ki la mynsaw; katei ka la jia katba kitei ki 5 ngut ki dang trei ban tan bording thymmai ha ka shnong Laitkor-Maw-arliang.Uba la khlad noh la tip kyrteng kum u Samborlang Nongspung, 43 snem karta na ka shnong Laitlum-Smit. Kiwei pat kiba mynsaw ki dei kiba la tip kyrteng kum u Brosstar Warbah,32 snem karta na ka shnong Laitlum-Smit, u Boseng Momin-26 snem karta na Goalpara, Assam, u Sengrik Marak-21 snem karta na Goalpara bad u Sukumar Sangma-40 snem karta na Goalpara-Assam.
La iathuh ba katba kitei ki 5 ngut ki dang ring bording, ki dang rah ia u nar ilektrik bad dang ia tan sainar kynsan kynsan uwei u nar ilektrik u la khyllem bad u la hap na khlieh jong u Sambor bad katei ka jingjia ka la jia ha ka por 10:30 baje eiei mynta ka step. La pynkit ia u mar-mar sha Civil Hospital, Shillong hynrei haba la poi ha hospital u la khlad noh na ka jingjur palat ka jingmynsaw. U bah Sambor la ong ba u la don 5 ngut ki khun.
Kiwei pat kiba la mynsaw ka dei namar ka jingbat ilektrik bad la ong ba ka don ka jingbakla jong ki ha ka por treikam. Kitei kiba mynsaw ki don mynta hapoh Civil hospital, Shillong.
Haba ia kren bad u kontraktor uba shim kontrak ia katei ka kam na ka sorkar u bah German Syiemlieh na ka shnong Nongspung uba donlang ha Civil Hospital, Shillong u la ong ba u la shim kontrak ban tan bording thymmai ha katei ka shnong ha Laitkor bad u la ai wai kylla ha u Brosstar uba don mynta ha Hospital ban pyndep ia katei ka kam bad u Brosstar u la ialam ia kitei ki nongtrei jong u baroh. U bah German u la ong ba wat la kim pat dei kiba la ioh laisen na ka sorkar, hynrei ki dei ki briew kiba la ju trei borabor ha ka kam bording, u bah Brosstar la ong ba u la don laisen. U kontraktor u la iathuh ba katei ka jingshim kontrak jong u ka dei ia ka kam kaba wan na ka Deendayal Upadhyaya Gram Jyoti jong ka sorkar pdeng.