Shillong,9 Nailar:
Ar ngut ki samla ba la tip kyrteng kum u Tebester Thabah 40 snem karta bad u Khrawkupar Roynee , 21 snem karta ki la shah kem ha ki pulit hynin ka miet ha ka por kumba 9:45 baje eiei mynmiet na Motphran hadien ba la mih ka jingiashoh ia dat hapdeng jong ki. Ki pulit ki la rah ia kitei ki ar ngut sha Hospital na ka bynta ban eksamin ia ka met jong ki bad hadien ba la eksamin ki doktor katei ka Hospital sorkar ki la ong ba baroh ar ngut ki la shu mynsaw malu mala. Kitei ki ar ngut ki dei kiba la shoh khawiang ha kaba kim lah shuh ban teh-la-kam ia lade namar ka jingbu-aid palat. Hadien ba la ioh ia ka repod na ki doktor ba kitei ki ar ngut ki la shu mynsaw malu mala ki pulit ki la rah ia ki sha sadar Police station bad la set ia ki ha ka ruhnar jong katei ka PS baroh shimiet. Mynta ka step ha ka por 11:45 eiei u Tebester Thabah u la ujor sha ki pulit da kaba u ud pang bad um sngewkhlain kumta ki pulit ki la rah ia u mar-mar sha Civil Hospital ha kaba la wan ban peit ia u da ka hynmen jong u ka Isiful Thabah . Hynrei ha ka por 2:45 eiei utei u rangbah 40 snem karta u la khlad noh namar ka jing ban jur ka jingmynsaw ia u. Ki pulit haduh mynta ki dang pynlong ia ka tohkit ia katei ka jingjia. Utei uba shah shoh u dei dang don ha kti ki pulit.
Phi don ban ong eiei?