Iap u myntri kam pohiing ka Pakistan

Islamabad, 16 Nailar:
U myntri kam poh ing ka Pakistan, ha ka Jylla Punjab, u Colonel (Retd) Shuja Khanzada u la iap mynta ka sngi namar ka jingbthei bom kaba la pynbthei da u riew kheinduh ha ingsah jong u hi.
Katei ka jingjia ka la jia katba kawei ka jing ialang ki riewlum kaba la tip kum ka Jirga ka dang iaid shakhmat ha Hujra ka jaka shongkai pyngngad tang na bynta ki shynrang kaba dei ka iing jong utei u myntri kam pohing kaba don ha ka sor Shadi Khan jong ka Attock District. Ha katei ka jingialang ki la don kumba 70 ngut ki briew, hynrei ha katei ka jingjia nalor u myntri kam pohiing ki don pat sa 11 ngut kiba iap.
Ki la don haduh 30 ngut kiba la mynsaw ha katei ka jingbthei Bom, kiba la sakhi da ki khmat lajong ki iathuh sha ki lad khubor ba ki iohi ba sa kumba 20 haduh 25 ngut ki briew ki shah tap, ha ki jingtwa ka ing bad la ong ba ki bor leit ai jingiarap ki dang ia khun ban sei ia ki briew kiba sahkut.
Kiba la iap ki kyn thup ruh ia u deputy superintendent of police, u Syed Shaukat ha kaba ia ka metiap jong u la lap na ki jaka kiba la shah tap ha ka jingwa jong katei ka ing namar ka jingbthei bom.
Ka Lashkar-e-Islam, kaba dei ka seng lehnoh kaba ia treilang bad ka Taliban ka la kam ia katei ka jingjia bad ka la ong ba ka pynhiar kput namar ka jingphah shipai ban khynra lehnoh ha ki thain ba sah ki riewlum bad namar ka jingbeh krad ki shipai ia ki lehnoh Lashkar na ki thain jong ka Khyber.
“Kiba kum kitei ki jinghiar thma kin dang iai bteng ha ki sngi ban sa wan” ong u Salahuddin Ayubi, u nongai ktien katei ka seng sha ki lad khubor, hynrei katkum ki ripod ba la pynpoi sha u myntri rangbah jong ka Punjab Province u Shahbaz Sharif da ki briew jong ka tnad ain katei ka Province ka Pakistan la ong ba ka jingshah hiar thma jong u Khanzada ka dei namar ka jingshah pyniap jong u khliehduh ka Lashkar-e-Jhangvi (LeJ) u Malik Ishaq.
U Ishaq, uba dei u nongseng ia ka LeJ, u la shah pyniap ryngkat 13 ngut kiwei pat ba kynthup ia ar ngut ki khun jong u ha ki pulit ha ka 29 tarik u naitung. Hadien ka jingiap u Ishaq ki bor ka Pakistan ki la pynkhlain ia ka jingpahara ia u myntri rangbah Shahbaz Sharif bad u myntri rangbah duh ka Pakistan u Nawaz Sharif .
Ki bahaing hasem bad ki paralok jong u Khandaza ki la iathuh ba u la shah byrngem pyniap la bun bunsien bad kat shaba u leit la ju syrtap ia u da ki bor pahara kiba biang hynrei ha ka sngi ba u iap ha ka jingbthei bom pat ym shym la don ki bor pahara bad ki pulit pynlip bom kiba synran ia u.