Iap sa uwei u nongbylla dewiong

Shillong, 12 Nohprah:
Hadien ba san ngut ki nongbylla tih dewiong ki la khlad ha krem dewiong ha Briwar ka East Jaintia Hills district, mynta ka sngi sa uwei u nongbylla u la iap hashen haba ka krem ka la twa kaba don ha katei ka district.
Kane ka jingjia ka long ha ka por 5.30 baje mynstep haba utei u nongbylla uba kyrteng kum u Jirmal Boro (32) u dang trei ha krem dewiong kaba dei jong u Weibor Dkhar ha Maibon kaba hap ha Umpleng AD Camp.
Utei u nongbylla u la iap hashen bad ka jingtohkit halor kane ka dang iaid. Lah ban kdew ba san ngut ki nongbylla tih dewiong ki la khlad noh ha kane ka taiew ba la dep haba ka synduk ba ki hiar ka hap namar ka jingdkut kynsan u tyllai ha ka 6 tarik Nohprah.
Tang mynta u snem, kumba ar phew ngut ki nongbylla tih dewiong ki la khlad ha ki bynta bapher bapher ka jylla naduh u Kyllalyngkot bad kane ka la buh ia ka jingkylli kaba jwat ia ki lad ki lynti ba ka sorkar ka shim ban iada ia ki nongbylla ha kum katei ka jait kam.