Iap kyndit u nongniah Roller ba shah weng kam ha ka PWD

Shillong, 1 Iaiong:
Uwei u nongniah kali tylliat surok ne ka Roller u la iap noh namar ka jingkyndit palat ba u la shah weng kam ha ka tnad PWD, ia kane la iathuh da u bah Disparsing Rani haba kren sha ki nongthoh khubor mynta ka sngi. U ba Rani um shym la lah ban pyntip ia ka kyrteng utei u nongniah Roller ba la iap bad mynno u la iap hynrei u la ong ba la shu pyntip ha ka shithi sha u da ki nongialam ka Association ki nongniah Roller.
U bah Disparsing Rani u la ong ba ka Meghalaya Officiating Roller Driver Association ki la pan jingiarap na u namar ka jingeh ba ki ia kynduh na kaba shah weng kam hak dak ha ka tnad PWD. U la ong ba katkum ka jingtip jong u u la ong ba ki don ki nongtrei kiba la trei haduh 30 snem ruh hynrei kim shym la shah thungkam ha katei ka tnad hynrei mynta pat la weng hak dak ia ki.
U la ong ba ki don 1588 tylli ki kam kiba lait bad 54 tylli na kitei ka dei ha High Way Sub-Division. Ia katei ka hukum ba ym dei shuh ban thung kam shipor ia ki nongtrei lapynmih naduh u snem 1993 hynrei ka tnad Personnel ka buhrieh ia katei bad kam shym la pyntip sha ki bor jong katei ka tnad bad da ka jingbym tip ki ruh ki thungkam shipor ia ki nongtrei bad mynta pat ka ijngeh ba ki ia kynduh ka long ba kin leh shuh kumno haba la poi ka hukum ban weng kam noh.
U la ong ba ha ka 9 tarik u nohprah, 2014 ka la mih ka hukum na u Director of accountant &Treasury, Shillong ba ym lah shuh ban siew tulop na ki nongtrei shipor namarba ka la don ka hukum ban ithuh noh ia ki nongtrei kum ki nongtrei sorkar naduh ka snem 1993. Ula ong ba kumba ka paw hangne la I kumba ka aiñ ka ing dorbar ka ialeh pyrshah pynban bad ki tnad sorkar.
Halor kane u la ong ba u la pan jingtip lyngba ka RTI kaba u la pan ia ki kyrteng jong ki 1588 ngut ki nongniah Roller ba pura jong ka sorkar kumba la kdew ba ki don ki jaka thylli 1588 ngut,u la pan ia ka mat jingdawa ba katei ka Association ka la phah ha ka 22 tarik u rymphang, 2016 sha ka sorkar,a kine baroh u la ong ba u la pan jingtip ha ka 30 tarik u lber, 2016 bad mynta u dang ap jubab.