Iap hashen u heprit 7 snem ba iuh ka trok pickup

Nongstoiñ: Ha kawei ka jingjia aksiden kali kaba la jia myn hynnin ka sngi, ha ka thaiñ Pariong u wei u heprit u bala tip kum u Menangiaijop Hoojon 7 snem na ka shnong Lawrynjam West Khasi Hills, u la khlad noh hashen hadien ba kawei ka pickup ka la ioh ban tylliat ia u.
Katei ka jingjia kala jia katba katei ka trok pickup kaba don ia u number ML10B- 8098 bala niah da u Kitborlang L Nonglait 25 snem na ka shnong Dommawlieh ka dang pynphai shadien hynrei la ong ba u tei u heprit u la sdien na sien bad u la kum hap ha kaba katei ka trok kala ioh ban iuh ia u.
Ha kaba iadei bad katei ka jingjia na ka liang jong u kpa jong u tei u heprit u bah Kmerding Marwein 38 snem ujor ia katei ka jingjia sha ki pulit bad na ka liang jong ki pulit ruh ki la register ia ka case katkum ka C/No. 13/2019 U/S 174CrPC bad ka jingtohkit ka dang iaid shakhmat.
Na ka liang jong ki bahaiing jong u tei u heprit kila leit ban kyrpad na ki bor ka ain ban pyllait noh ianka post mortem bad hadien ba kila ioh ruh ia ka jingbit ki pulit kila aiti noh ia ka met jong u tei u heprit sha ki bahaiing ban pyndep ia kaba sah.